१० करोड ३५ लाखको लागतमा प्रशासनिक भवन निर्माण शुरु
- भञ्ज्याङ समाचारदाता (म्याग्दे)
तनहुँको म्याग्दे गाउँपालिकाले प्रशासनिक भवन निर्माण शुरु गरेको छ । हालसम्म भाडामा सञ्चालन हुँदै आएको गाउँपालिकाले १० करोड ३५ लाख ६९ हजार ८८४ रुपैयाँको लागतमा भवन निर्माण गर्न लागेको हो । चालु आर्थिक वर्षमा ६ करोड ८५ लाख ५० हजार २५ रुपैयाँ र आगामी आवमा ३ करोड ५० लाख १९ हजार ८५८ रुपैयाँको काम खर्च हुने र दुइ वर्षभित्र भवन निर्माण सम्पन्न गर्ने लक्ष्य रहेको प्रमुख प्रशासकीय अधिकृत नारायणप्रसाद अधिकारीले बताएका छन् ।
दुइ भवन निर्माणका लागि स्वीकृत लागत रकममध्ये यो वर्ष गाउँसभाको निर्णयबमोजिम ३ करोड रुपैयाँ, जिल्ला समन्वय समिति कोषमार्फत प्राप्त हुने रकम, आन्तरिक स्रोत र आगामी आवमा संघीय र प्रदेश सरकारमार्फत प्राप्त हुने बताइएको छ । चालु आर्थिक वर्षा प्रोटेक्सन वर्क्स, जमिन मिलाउने, कालोपत्रेबाहेक बाटो तयार गर्ने, नाली निर्माण तथा बायोइन्जिनियरिङका काम हुनेछन् । आगामी वर्ष तेस्रो तल्ला भवन निर्माण, बाटो कालोपत्रे र गेट तथा पार्क निर्माण गर्ने लक्ष्य राखिएको प्रमुख प्रशासकीय अधिकृत अधिकारीले बताए ।
यस्तै, भवनको एक कार्यक्रमका बीच बुधबार पूर्वसभामुख तारानाथ रानाभाटले शिलान्यास गरेका छन् । भवन शिलान्यास गर्दै पूर्वसभामुख रानाभाटले स्थानीय तहको निर्वाचन सम्पन्न भएको लामो समयपछि गाउँपालिकाले भवन निर्माण शुरु गरेकामा धन्यवाद दिँदै निर्धारित समयमै गुणस्तरीय भवन निर्माणतर्फ ध्यान दिन आग्रह गरे ।
वि.सं. २०७६ फागुन २७ गतेको गाउँसभाको निर्णय बमोजिम गाउँपालिकाको केन्द्रसहित भवन निर्माण गर्ने गरी म्याग्दे गाउँपालिका-४ नारिङ्गेलाई निर्धारण गरिएको छ । भवन निर्माणका लागि लालपूर्जाभित्रको कित्ता नं ५२ क्षेत्रफल एक रोपनी एक आना तीन पैसा तीन दाम जग्गा निःशुल्क प्राप्त भएको छ भने ८० रोपनी १४ आना तीन पैसा जमिन सार्वजनिक रहेको गाउँपालिकाकी अध्यक्ष माया राना आलेले जानकारी गराइन् । कटेरो इञ्जिनीयरिङले गरेको माटो परीक्षण अनुसार उक्त ठाउँमा चार तलासम्म भवन निर्माण हुनसक्ने बताइएको छ ।
