बन्दिपुर गाउँपालिका : कृषि, स्वास्थ्य र पर्यटन पूर्वाधार विकास कार्यक्रम प्रथामिकतामा

बन्दिपुर गाउँपालिकाले आगामि आर्थिक वर्षको नीति, कार्यक्रम तथा बजेटमा कृषि र पर्यटन पूर्वाधार विकास कार्याक्रमलाई प्राथमिकतामा राखेको छ । गाउँपालिकाले बजेटमा चर्चित पर्यटकीय स्थल मिनी ग्रेट वाल र सिसाको भ्यु टावर प्रत्येकलाई डेढ करोड विनियोजन गरेको छ ।

यसअघि नीति तथा कार्यक्रम प्रस्तुत गर्दै गाउँपालिका अध्यक्ष पूर्णसिं थापाले पर्यटकीय पूर्वाधार विकासमा प्राथमिकता दिने उल्लेख गरेका थिए । गाउँपालिकाले डुम्रे बन्दीपुर जाने सडकको स्तरोन्नतिका लागि २ करोड १३ लाख रुपैयाँ विनियोजन गरेको छ । अन्य पर्यटकलक्षित योजनामा पनि गाउँपालिकाले बजेट विनियोजन भएको प्रमुख प्रशासकीय अधिकृत महेश सुवेदीले बताए ।

पर्यटन पूर्वाधार निर्माणका लागि मणिमुकुन्देश्वरी पर्खालको निर्माण कार्यलाई निरन्तरता दिंदै मिनी ग्रेटवाललाई पर्यटकीय हवको रुपमा विकास गर्न १ करोड ५० लाख र टुडिखेलमा शिशाको भ्यूटावर निर्माण गर्न १ करोड ५० लाख, जनप्रतिनिधि पार्कलाई १० लाख रुपैयाँ बजेट विनियोजन गरिएको सुवेदीले बताए ।

यस्तै, गाउँपालिकाले आगामि आर्थिक वर्ष २०७८/०७९ का लागि ५१ करोड ३४ लाख एक हजार पाँच सयको अनुमानित बजेट सार्वजनिक गरेको छ । नवौं गाउँसभामा उपाध्यक्ष करुणा गुरुङले आगामि वर्षका लागि उक्त र्सार्वजनिक गरेकी हुन्। गाउँपालिकाले संघ सरकारमार्फत वित्तीय समानिकरण अनुदान बापत ९ करोड ४ लाख, सशर्त अनुदान बापत १८ करोड ७५ लाख, विशेष अनुदानबापत २ करोड ४९ लाख, राजश्व बाँडफाँड बापत ६ करोड ५४ लाख ९१ हजार प्राप्त हुने अनुमान गरिएको उपाध्यक्ष गुरुङले बताइन ।

गण्डकी प्रदेश सरकारमार्फ वित्तीय समानीकरण अनुदान बापत १ करोड ५ लाख ३१ हजार, राजश्व बाँडफाँड बापत ८९ लाख ३२ हजार, विशेष अनुदान बापत ५० लाख, समपुरक अनुदान बापत ५० लाख प्राप्त हुने अनुमान गरेको छ ।

गाउँपालिकाले कोरोना संक्रमणको महामारी रोकथाम तथा नियन्त्रण र उपचारका लागि २० लाख, बन्दिपुर अस्पताल तथा आधारभूत स्वास्थ्य केन्द्रहरुमा आधारभूत तथा आकस्मिक स्वास्थ्य सेवाका लागि औषधी खरिद गर्न ३३ लाख बजेट विनियोजन गरेको छ ।

कृषिमा श्रम तथा लागत न्यूनिकरण गर्दै यान्त्रिकरण मार्फत उत्पादन र उत्पादकत्व वृद्धि गरी खाद्यान्नमा आत्मनिर्भर बनाउन कृषकलाई ५० प्रतिशत अनुदानमा कृषि मेसिनरी तथा औजार वितरण गर्न बजेट विनियोजन गरेको छ । कृषि यान्त्रको प्रयोग गर्न कठिनाई हुने क्षेत्र, साना किसानलाई लक्षित गरी एक हल गोरु : एक थान हलो कार्यक्रमका लागि बजेट विनियोजन गरिएको गाउँपालिका अध्यक्ष पूर्णसिं थापाले बताए ।

कृषिमा युवाहरुको आकर्षण बढाउन, व्यवसायिक कृषकलाई प्रोत्साहन गर्न गाउँपालिका उत्कृष्ट कृषक पुरस्कार स्थापना गर्ने भएको छ । सहकारीमा आवद्ध किसानहरुलाई सहकारीमार्फत प्रति लिटर दूध उत्पादनमा एक रुपैयाँ अनुदान दिन रकम विनियोजन गरिएको छ । गाउँपालिकाभित्रका कृषि उत्पादन संकलन गर्न डुम्रे बजारस्थित साना सहकारीबाट हस्तान्तरित भवनमा कृषि उपज संकलन केन्द्र स्थापना गर्न ६० लाख विनियोजन गरिएको अध्यक्ष थापाले बताए । कृषि उपजको समुचित भण्डारणका लागि चिस्यान केन्द्र स्थापना गर्न ८३ लाख विनियोजन गरिएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर