म्याग्देको अकलादेवी मन्दिरमा तोडफोड, मुर्ती समेत चोरी
राजकुमार आले
तनहुँको प्रसिद्ध धार्मिकस्थल म्याग्दे गाउँपालिका-६ स्थित अकलादेवी मन्दिरबाट देवीको मुर्ती चोरी भएको छ । पृथ्वीराजमार्गसंगै रहेको उक्त मन्दिरको गएराती अज्ञात समुहले मन्दिरको ढोकामा लगाइएको ताल्चा फोडी मुर्ती चोरेर लगेको मन्दिर विकास तथा व्यवस्थापन समितिका सचिव बसन्त थापाले जानकारी दिए ।
सचिव थापाको अनुसार मन्दिरमा रहेको गणेशको मुर्ती, शंख, घण्टी, तरबार लगायतका सामानहरु चोरी भएको छ । मन्दिरको गजुर भने सुरक्षित रहेको जनाइएको छ ।
विहान पुजारी मन्दिरमा दैनिक नित्यपुजाका लागि जाँदा मन्दिरमा मुर्ती चोरी भएको थाहा पाएका थिए । अहिले प्रहरी आएर घट्नाको विषयमा अनुसन्धान गरिरहेको थापाले बताए ।
