तनहुँका स्थानीय तह आफ्नै पाठ्याक्रम बनाउँदै

तनहुँको स्थानीय तह आफ्नै पाठ्यक्रम बनाउने तयारीमा जुटेका छन् । भुगोल, आर्थिक, राजनीतिक, धार्मिक, सांस्कृतिक तथा ऐतिहासिक, साहित्यिक र पर्यटकीय क्षेत्रलाई समेटेर प्राथमिक तहमा स्थानीय पाठ्यक्रम निर्माण गर्ने तयारीमा जुटेका हुन् ।

जिल्लाका १० पालिकामध्ये ६ वटा पालिकाले स्थानीय पाठ्यक्रम तयार गरेका छन् । व्यास, भिमाद नगरपालिका, आँबुखैरेनी, म्याग्दे र देवघाट गाउँपालिकाले स्थानीय पाठ्यक्रम तयार गरिसकेका छन् भने भानु, शुक्लागण्डकी नरपालिका, बन्दिपुर, घिरिङ, ऋषिङ गाउँपालिकाले भने यसै आर्थिक वर्षा स्थानीय पाठ्यक्रम निर्माण गर्ने गरी तयारी थालेका छन् ।

गाउँपालिकाको सामान्य परिचय, भौगोलिक अवस्था, साँध सिमाना, जनसंख्या, जातजाति, संघसंस्थाहरु लगायतलाई समावेश गरी कक्षा १ देखि ५ सम्मका लागि पाठ्यक्रम तयार गरिएको म्याग्देका शिक्षा शाखा प्रमुख बुद्धिसागर खनालले बताए । उनले भने, ‘पाठ्यक्रममा प्राकृतिक स्रोत सम्पदा, संस्कार र संस्कृति, ऐतिहासिक, पर्यटकीय र धार्मिक स्थल, पेशा, स्वास्थ्य सरसफाई, प्रकोप वातावरण आदि क्षेत्रलाई समेत समेटिएको छ ।’ गाउँपालिकाद्वारा निर्माण गरिएको पाठ्यक्रम गाउँपालिका क्षेत्रभित्रका विद्यालयमा बाढिएको र यहि शैक्षिक सत्रबाट सबै विद्यालयमा पठनपाठन सुरु गरिएको छ ।

यस्तै, व्यासले १ देखि ३ कक्षाका लागि पाठ्यक्रम र १ कक्षाको लागि पाठ्यपुस्तक तयार गरिसकेको नगरपालिकाका शिक्षा शाखा प्रमुख नरेन्द्रप्रसाद रेग्मीले बताए । उनले भने, ‘कक्षा १ को पाठ्यपुस्तक सबै विद्यालयमा बाढिसकिएको छ । अन्य कक्षाको पुस्तक बनाउने तयारी भैरहेको छ ।’

देवघाटले भने ०७४/०७५ सालमै बनाएको पाठ्यक्रमलाई केही परिमार्जन गरी विद्यालयहरुलाई वितरण गर्ने तयारी गरेको गाउँपालिकाका शिक्षा शाखा प्रमुख होमनाथ लामिछानेले बताए । बन्दिपुरले भने पाठ्यक्रमको प्रारम्भिक तयारी भएको तर विज्ञहरुसंग बसि छलफल गर्न नपाउदा सम्पन्न हुन नसकेको गाउँपालिकाका प्रमुख प्रशासकीय अधिकृत महेश सुवेदीले बताए । उनले भने, ‘कोरोना संक्रमण जोखिमका कारण विज्ञहरु बोलाएर छलफल गर्न सकिएको छैन । अब केही महिनाभित्र पाठ्यक्रमको टुङ्गो लगाउने तयारीमा छौं ।’

सेयर गर्नुहोस्

प्रतिक्रिया दिनुहोस्

सम्बन्धित खवर