तनहुँको ढोरबाराही मन्दिरमा सर्वसाधारणलाई पुजाअर्चना तथा प्रवेशमा रोक
राजकुमार आले/भञ्ज्याङ
तनहुँको शुक्लागण्डकी नगरपालिकाको ढोरफिर्दीमा रहेको ढोरबाराही मन्दिरमा सर्वसाधारणलाई पुजाअर्चना तथा प्रवेशमा रोक लगाइएको छ ।
कोरोना संक्रमण तीव्र रुपमा फैलिरहेकाले संक्रमण रोकथाम तथा न्यूनिकरणका लागि भन्दै प्रसिद्ध धार्मिकस्थल ढोरबाराही मन्दिर प्रवेशमा रोक लगाइएको हो ।
जिल्ला प्रशासन कार्यालय तनहुँको आदेश अनुसार हाललाई शुक्रबारदेखि माघ मसान्तसम्म नित्यबाहेकका पुजामा रोक लगाइएको मन्दिरका पुजारी चिरञ्जिवी लम्सालले बताए ।
‘धार्मिक शक्तिपीठहरू बन्द गर्ने नेपाल सरकार तथा जिल्ला प्रशासनको आदेशलाई कार्यान्वयन गर्दै मन्दिरमा भक्तजनको प्रवेशलाई रोक लगाएका हौं,’ उनले भने ।
मन्दिरमा भक्तजनबाट हुने बलीपुजा, पञ्जवली, लाखबत्ती बाल्ने, दर्शन गर्न जाने जस्ता धार्मिक गतिविधिमा पूर्णरुपमा रोक लगाइएको छ । ढोरबाराही मन्दिरमा कोरोना संक्रमण फैलिनुअघि दैनिक सयौंको संख्यामा भक्तजनहरु पुजाअर्चना तथा दर्शनका लागि जाने गर्दथे ।
