रिस्ती मतदान क्षेत्रमा अनधिकृत व्यक्तिलाई प्रवेश निषेध
भञ्ज्याङ न्यूज
तनहुँको व्यास नगरपालिका-८ रिस्ती स्थित गाविस भवन फेदी मतदान केन्द्रमा अनधिकृत व्यक्तिलाई प्रवेशमा जिल्ला प्रशासनले रोक लगाएको छ । गाविस भवन फेदी मतदान केन्द्र (क) र (ख) मा भोली बुधबार हुने पुनः मतदानका बेला बिहान ७ बजेदेखि मतदान कार्य सम्पन्न नभएसम्म अनधिकृत व्यक्तिलाई प्रवेश निषेध गरिएको हो ।
उक्त मतदान केन्द्रभित्र मतदाता, उम्मेदवार र निजको प्रतिनिधि, निर्वाचनमा खटिएका कर्मचारी, अनुमति प्राप्त व्यक्ति वा संस्थाका प्रतिनिधि र सुरक्षामा खटिएका कर्मचारी बाहेक अन्य व्यक्तिलाई प्रवेश निषेध गरिएको प्रमुख जिल्ला अधिकारी विश्वप्रकाश अर्यालले बताए ।
गत वैशाख ३० गते स्थानीय तह निर्वाचनका क्रममा व्यास नगरपालिकाका प्रमुखका उम्मेदवार दीपकराज जोशीमाथि मतदान केन्द्रभित्रै आक्रमण भएपछि निर्वाचन आयोगले उक्त मतदान केन्द्रमा पुनः मतदान गर्ने निर्णय गरेको थियो ।
उक्त केन्द्रमा हुन लागेको पुनः मतदान कार्यलाई लक्षित गरी सुरक्षा व्यवस्था कडा पारिएको छ । मतदातालाई सुरक्षित, भयरहित वातवरणमा मतदान गर्न आवश्यक सम्पूर्ण तयारी पुरा गरेको मुख्य निर्वाचन कार्यालयले जनाएको छ ।
