आँबुखैरेनीमा ‘आँबुखैरेनी वाङ्मय परिषद’ गठन
भञ्ज्याङ न्यूज
भाषा, साहित्य, कला, संस्कृति र गीतसङ्गीतको विकास र सम्वर्द्धनमा टेवा पुर्याउने उद्देश्यका साथ तनहुँको आँबुखैरेनी गाउँपालिकाले ‘आँबुखैरेनी वाङ्मय परिषद’ गठन गरेको छ ।
गाउँपालिकाको सभाकक्षमा आयोजित एक भेलाबाट साहित्यकार कवि अनिल श्रेष्ठको अध्यक्षतामा ११ सदस्यीय आँबुखैरेनी वाङ्मय परिषद गठन गरेको हो ।
परिषद्को उपाध्यक्षमा सानुकाजी थापा, सचिवमा युवराज बगाले, सहसचिवमा कमल सापकोटा, कोषाध्यक्षमा राजेन्द्र गुरुङ र सदस्यहरुमा रजनी चुमान, श्रीराम भट्टराइ, कहरसिं थापा, कमला पन्त, निर्मला कुँवर र दिलमाया भुजेल चयन भएका छन् ।
भेलामा गाउँपालिकाका प्रमुख प्रशासकीय अधिकृत गोपीकृष्ण अर्यालले आँबुखैरेनी गाउँपालिकाको ११औं गाउँपरिषदबाट ‘आँबुखैरेनी वाङ्मय परिषद ऐन-२०७९’ स्वीकृत र पारित गरी २०७९ असार ०३ गते बसेको आँबुखैरेनी गाउँपालिका, गाउँ कार्यपालिकाको बैठकको निर्णय अनुसार वाङ्मय परिषद गठन गरिएको र आँबुखैरेनीको भाषा, साहित्य, कला र गीतसङ्गीतको विकास र सम्वर्द्धनमा यस परिषदको भूमिका उल्लेखनीय रहने बताए ।
वाङ्मय परिषदको प्रमुख संरक्षक एवं गाउँपालिकाका अध्यक्ष शुक्र चुमानले आँबुखैरेनीको आर्थिक समृद्धिमा कृषिसँगै पर्यटनलाई जोड्नुपर्ने र पर्यटकीय क्षेत्रको प्रचारप्रसार र विकासमा कलासाहित्यको भूमिका महत्वपूर्ण रहने बताउँदै श्रमिकहरुको श्रमलाई साहित्यले स्थापित गर्न लेखक साहित्यकारहरुले जोड दिनुपर्ने बताए ।
अध्यक्ष चुमानले साहित्य, कला र सङ्गीतको विकास र शोधअनुसन्धानमुलक कार्यका लागि आँबुखैरेनी गाउँपालिकाले ‘आँबुखैरेनी वाङ्मय परिषद’को लागि आ. ब. २०७९/०८० बजेटबाट १५ लाख रुपैयाँ विनियोजन गरेको जानकारी गराए ।
परिषदको पहिलो बैठकले आँबुखैरेनीको पर्यटकीय स्थलको रुपमा रहेको आँदीमुलमा यही भाद्र २५ गते ‘आँदीमुल शरदकालीन काव्योत्सव’ को आयोजना गर्ने निर्णय गरेको बताइएको छ ।
