भानु नगरपालिकाद्वारा प्याड डिस्पोजल मेशिनको सफल परीक्षण र जडान

तनहुँको भानु नगरपालिकाले विद्यालयमा वितरण गर्न लागेको इलेक्ट्रोनिक सेनिटरी प्याड डिस्पोजल मेशिनको परीक्षण गरी जडान गरेको छ । नगरपालिकाले वडा नं. २ स्थित होमराज लोहनी शारदा शिक्षा सदन माध्यमिक विद्यालय नारेश्वरटारमा मेशिन परीक्षण गरी जडान गरेको हो ।

विद्यालयमा जडान गरिएको उक्त मेशिनमा परीक्षणका लागि सेनिटरी प्याड राखेर प्रयोगात्मक रूपमा डिस्पोज गरिएको थियो । मेशिन बिक्रेता कम्पनीको तर्फबाट प्राविधिक सागर खनाल र भानु नगरपालिकाका कर्मचारीहरूले विद्यार्थीहरुको सहभागितामा उक्त मेशिन परीक्षण गरेका थिए ।

त्यस्तै, विद्यालयका सेनिटरी प्याड व्यवस्थापन गर्ने महिला फोकल पर्सन उषा श्रेष्ठ तथा प्याड प्रयोगकर्ता कक्षा ९ र १० मा अध्ययनरत बालिकाहरूले मेशिन परीक्षणको अवलोकन गरी यसको सहि प्रयोग गर्ने तरिकाका विषयमा जानकारी लिइएका थिए भने प्राविधिकहरुले सहजीकरण गरेका थिए ।

वातावरणमैत्री र प्रयोगकर्तामैत्री इलेक्ट्रोनिक मेशिनको प्रयोगबाट सेनिटरी प्याडको उचित व्यवस्थापन र विर्सजन गर्न सघाउ पुग्ने नगर शिक्षा अधिकारी ध्रुव राज पौडेलले बताए । प्रयोग भएका प्याड यस मेशिनमा राख्ने र भरिएपछि मेशिन स्टार्ट गर्दा २५ देखि ३० मिनेटमा सबै प्याड डिस्पोज भई खरानीमा परिणत हुने प्राविधिकले बताएका छन् । मेशिनमा प्याड डिस्पोज भई निस्कने धुवाँ आउटलेट पाइपबाट बाहिर फाल्ने व्यवस्था गरिएको छ ।

नेपाल सरकारले कक्षा ६ देखि १२ सम्म सामुदायिक विद्यालयमा अध्ययनरत बालिकालाई निःशुल्क सेनिटरी प्याड वितरण गरिरहेको छ । यसको सहि ढंगले विर्सजन गर्नका लागि भानु नगरपालिकाले सबै सामुदायिक माध्यमिक विद्यालयहरूमा यो मेशिन वितरण गर्ने तयारी गरेको शिक्षा अधिकारी पौडेलले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर