सामुदायिक वन दिवस-२०७९ : उत्कृष्ट सामुदायिक वन पुरस्कृत

तनहुँमा विविध वनजन्य गतिविधि गरी सामुदायिक वन दिवस-२०७९ मनाइएको छ । डिभिजन वन कार्यालय, सामुदायिक वनको सहकार्यमा वृक्षारोपण, सरसफाई तथा वन र वातावरणको महत्वका विषयमा चर्चा गरी सामुदायिक वन दिवस-२०७९ मनाइएको हो ।

दिवसका अवसरमा डिभिजन वन कार्यालय तनहुँले जिल्लाका उत्कृष्ट सामुदायिक वनलाई पुरस्कृत गरेको छ । कार्यालयले आर्थिक वर्ष २०७७/०७८ र २०७८/०७९ का उत्कृष्ट तीन/तीन सामुदायिक वनलाई पुरस्कृत गरेको छ ।

उत्कृष्ट हुन सफल सामुदायिक वनलाई बुधबार म्याग्दे गाउँपालिका-२ ज्यानटाङ पधेंरा सामुदायिक वनमा आयोजित कार्यक्रमबीच पुरस्कार प्रदान गरिएको छ । आर्थिक वर्ष २०७८/०७९ मा बन्दिपुर गाउँपालिका-२ स्थित पार्चे सामुदायिक वन उपभोक्ता समूह प्रथम, म्याग्दे गाउँपालिका-२ स्थित वाराही सामुदायिक वन उपभोक्ता समूह द्वितीय र व्यास नगरपालिका-११ स्थित बूढीराम्चे सामुदायिक वन उपभोक्ता समूह तृतीय भएका थिए ।

यस्तै, आर्थिक वर्ष २०७७/०७८ मा बन्दिपुर गाउँपालिका-३ स्थित देवीथुम्का सामुदायिक वन उपभोक्ता समूह प्रथम, म्याग्दे गाउँपालिका-२ स्थित ज्यानटाङ पधेंरा खोला सामुदायिक वन उपभोक्ता समूह द्वितीय र बन्दिपुर गाउँपालिका-१ स्थित छपेली सामुदायिक वन उपभोक्ता समूह तृतीय भएका थिए ।

प्रथम, द्वितीय र तृतीय हुने समूहलाई क्रमशः रु १० हजार, रु ८ हजार र रु ६ हजार नगदसहित प्रमाणपत्रले पुरस्कृत गरिएको डिभिजन वन कार्यालय तनहुँका प्रमुख कोमलराज काफ्लेले बताए । अघिल्लो आवमा कोभिड-१९ संक्रमणका कारण कार्यक्रम गर्न नसकिएपछि दुबै आवका उत्कृष्ट वनलाई आजनै पुरस्कृत गरिएको उनले बताए ।

वन संरक्षण, संवर्द्धन, सामाजिक विकास, समुदायको विकास, वनको सुशासन लगायतलाई मूल्याङ्कन गरी उत्कृष्ट वन समूह छनोट गरिएको थियो । जिल्लामा ६२१ सामुदायिक वन रहेका छन् ।

उक्त अवसरमा जिल्ला समन्वय समितिका प्रमुख शान्तिरमण वाग्ले, म्याग्दे गाउँपालिकाका अध्यक्ष श्रीप्रसाद श्रेष्ठ, उपाध्यक्ष बालकृष्ण घिमिरेले पुरस्कृत हुने सामुदायिक वनका प्रतिनिधिलाई पुरस्कार र प्रमाणपत्र प्रदान गरेका थिए । कार्यक्रममा समन्वय समितिका प्रमुख वाग्लेले सामुदायिक वनले नेपालको प्रख्याति विश्वमाझ कमाएको चर्चा गर्दै त्यतिले मात्र सन्तुष्ट हुने अवस्था नरहेको बताए ।

म्याग्दे गाउँपालिकाका अध्यक्ष श्रेष्ठले वनलाई आम्दानीको स्रोत बनाउनेतर्फध्यान दिन आग्रह गरे । उनले वनबाट वन समूहका उपभोक्ताको आयस्तर वृद्धि गर्नेतर्फ लाग्न सुझाव दिए । गाउँपालिकाका उपाध्यक्ष घिमिरेले सामुदायिक वन जोगाउन स्थानीयको अपनत्व जागृत गराउनुपर्ने बताउँदै उपभोक्ताको जीवनस्तर उकास्न सामुदायिक वनको भूमिका महत्वपूर्ण हुने विश्वास व्यक्त गरे ।

डिभिजन वन प्रमुख काफ्लेले नेपालको वन व्यवस्थापन विश्वकै उत्कृष्ट रहेको र वन संरक्षणमा स्थानीयको योगदान रहँदै आएको बताए । वनलाई समृद्धिसँग जोडेर आयआर्जन गर्नेतर्फ लाग्नुपर्ने बेला आएको हुँदा उपभोक्ताहरु यस तर्फ सक्रिय बन्न सुझाए ।

यस्तै, सामुदायिक वन दिवसका अवसरमा म्याग्दे-२ ज्यानटाङ पधेंरा खोला सामुदायिक वनमा दुइ सय बिरुवा रोपिएको छ । सामुदायिक वनभित्र निर्माण गरिएको हरितपार्कभित्र विभिन्न प्रजातिका बिरुवा रोपण गरिएको छ । हरितपार्कभित्रै रूखमाथि घर निर्माण गरिएको छ । यसले आन्तरिक पर्यटकलाई आकर्षित गरिरहेको सामुदायिक वनका अध्यक्ष अर्जुन रानाभाटले बताए ।

हरित पार्कलाई हरियाली बनाउन विभिन्न प्रजातिका बिरुवा रोपिएको डिभिजन वन कार्यालयले जनाएको छ । समन्वय समितिका प्रमुख, म्याग्दे गाउँपालिकाका अध्यक्ष, उपाध्यक्ष, डिभिजन वनका प्रमुखसहित कर्मचारी र सामुदायिक वनका उपभोक्ताहरुले सो अवसरमा संयुक्त रुपमा बिरुवा रोपेका थिए ।

सेयर गर्नुहोस्

प्रतिक्रिया दिनुहोस्

सम्बन्धित खवर