चितुवाको आक्रमणमा परी बन्दिपुरका तीन वर्षीय बालक गम्भिर घाइते
भञ्ज्याङ न्यूज
तनहुँको बन्दिपुर गाउँपालिका-१ उपल्लो फाँटमा चितुवाको आक्रमणमा परी एक बालक गम्भिर घाइते भएका छन् ।
घर आँगनमा खेलिरहेको अवस्थामा चितुवाले साँझ करिब ६ः३० बजेको समयमा आक्रमण गर्दा स्थानीय सुभाष परियारका तीन वर्षीय छोरा सुलभ गम्भिर घाइते भएको गाउँपलिकाका निवर्तमान अध्यक्ष पूर्णसिं थापाले बताए ।
चितुवाले बालकको घाँटीमा दाँत गाँढेर गम्भिर घाइते बनाएको र उनको डुम्रे स्थित मोती हेल्थ क्लिनिकमा प्राथमिक उपचार गरी चितवन पठाइएको थापाले बताए ।
घर भित्र आमा खानाबनाउँदै गरेको र बालक आँगनमा खेलिरहेको अवस्थामा अचानक चितुवाले आक्रमण गरेको आमाले थाहापाएपछि हल्लाखल्ल गरी करिब ५० मिटरको दुरीबाट चितुवाको पञ्जाबाट बालक फुत्काउन सकिएको वडाध्यक्ष शिवकुमार श्रेष्ठले बताए ।
बन्दिपुर-१ क्षेत्रमा पछिललो समय चितुवाको आक्रमण बढ्दै गएपछि डिभिजन वन कार्यालय तनहुँको समन्वयमा तीन वटा फलामको खोरमा पासो थापिएपनि खोरमा चितुवा नपरेको वडाध्यक्ष श्रेष्ठले बताए ।
चितुवा आक्रमण बढ्दै गएपछि प्रभावित क्षेत्रमा काठको खोरमा पासो थापि नियन्त्रण गर्ने विषयमा डिभिजन वन कार्यालयसंग छलफल गर्ने तयारी गरिएको उनले बताए ।
यस क्षेत्रमा दैनिक जसो चितुवाले बाख्रा, गाईगोरु, भैसीलाई आक्रमण गर्ने र घरआँगनमै आएर बालबालिकालाई समेत आक्रमण गर्न थालेको छ ।
