एमाले नेतृत्वले गरेका काम नै चुनाव जित्ने पर्याप्त आधार : गुरुङ

नेकपा एमाले स्थायी कमिटी सदस्य एवं तनहुँ निर्वाचन क्षेत्र नं. २ का प्रतिनिधी सभा सदस्य उम्मेदवार किरण गुरुङले एमाले नेतृत्वले केन्द्र र प्रदेश सरकारले गरेका विकास निर्माण कार्यनै निर्वाचन जित्ने पर्याप्त आधार भएको बताएका छन् ।

मंगलबार बेलचौतारामा सम्पन्न नेकपा एमाले शुक्लागण्डकी नगर कमिटीको विस्तारित बैठकलाई सम्बोधन गर्दै उनले एमाले र अहिलेको गठबन्धनको नेतृत्वको तुलना गरी जनताले मत दिने विश्वास व्यक्त गरे ।

‘केन्द्रीयस्तरका केन्द्रले र प्रदेश स्तरका थुप्रै योजना गण्डकी प्रदेशले म आफै मन्त्रि हुदा थुप्रै काम भए,’ उनले भने, ‘तर अहिले गठबन्धनको सरकार बनेपछि बदनामी मात्रै कमाएको छ । प्रदेश सरकारलाई हेर्ने दृष्टिकोण समेत त्यति राम्रो छैन।’

पूर्व मन्त्री समेत रहेका गुरुङले समृद्ध र सुखी नेपाल नेपाल निर्माणकालागि एमाले परिपक्क पार्टी रहेको उल्लेख गरे । उनले शुक्लागण्डकी-९ घारीमा बन्न लागेको औधोगिक ग्रामको शुरुवात एमाले नेतृत्वको पालामा भएको सुनाउदै अहिले जग्गा प्राप्तीको चरणमा रहेको बताए । नेता गुरुङले निर्वाचन आचारसंहिता पालना गर्दै मतदाताकोबीचमा पुग्न तल्ला कमिटीलाई आग्रह गरे ।

नगर कमिटी अध्यक्ष मुक्तिनाथ तिम्सेनाको अध्यक्षतामा भएको कार्यक्रममा जिल्ला अध्यक्ष श्रीप्रसाद श्रेष्ठ, प्रदेश कमिटी सदस्यहरु दुर्गा प्रसाद पराजुली, प्रदेश कमिटी सदस्य एवम् तनहुँ २ प्रदेश २ का उम्मेदवार श्यामराजा महत, कृष्ण कुमारी गुरुङ, हर्क गुरुङ, रुद्र प्रसाद पौडेल, कमल ढकाल, जिल्ला कमिटी सचिवालय सदस्य फूलमाया वाग्ले, नगर कमिटी उपाध्यक्ष इन्द्र गुरुङ, सचिव रघुनाथ पौडेल लगायतले बोलेका थिए ।

भिमादमा एमालेको निर्वाचन सम्पर्क कार्यालय

यस्तै, मंसिर ४ गते हुने निर्वाचनका लागि नेकपा एमालेले भिमादमा सम्पर्क कार्यालय स्थापना गरेको छ । एमालेले भिमादमा क्षेत्र नम्बर २ प्रदेश २ को सम्पर्क कार्यालय स्थापना गरेको हो । उक्त कार्यालयको मंगलबार उदघाटन गर्दै एमाले स्थायी कमिटी सदस्य एवं क्षेत्र नम्बर २ का प्रतिनिधिसभा सदस्य उम्मेदवार किरण गुरुङले एमालेप्रति जनताको विश्वास र भरोसा रहेकाले एमालेको विजयलाई कसैले रोक्न नसक्ने बताए ।

क्षेत्र नम्बर २ प्रदेश २ का उम्मेदवार केदार सिग्देलले एमालेको नेतृत्वमा विकास सम्भव रहेकाले एमालेको विजय आवश्यक रहेको बताए ।

तनहुँ-१ का ४२ वटै वडामा निर्वाचन परिचालन कमिटी

आसन्न निर्वाचनका लागि नेकपा एमालेले तनहुँ क्षेत्र नम्बर १ अन्तर्गतका ४२ वटै वडामा निर्वाचन परिचालन कमिटी गठन गरेको छ । क्षेत्र नम्बर १ अन्तर्गतका सबै वडा कमिटीको मंगलबार आयोजित विस्तारित बैठकले निर्वाचन परिचालन कमिटी गठन गरी कार्यालय स्थापना गरेको हो ।

यसैगरी तनहुँ क्षेत्र नम्बर १ अन्तर्गतका पाँच वटै पालिकामा बैठक सम्पन्न गरी कार्यालय उद्घाटन गरिएको एमाले तनहुँका उपसचिव प्रदीपराज अधिकारीले जानकारी दिए । तनहुँ क्षेत्र नम्बर १ अर्न्तर्गतको निर्वाचन परिचालन कमिटी बुधबार दमौलीमा स्थापना गरिनेछ । यस्तै क्षेत्र नम्बर १ को प्रदेश निर्वाचन परिचालन कमिटी बिहीबार डुम्रेमा स्थापना गरिने अधिकारीले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर