तनहुँको सबै मतदान केन्द्रमा मतदान कार्य सुरु, तनहुँ-१ का प्रतिस्पर्धी पौडेल, राना र जोशीले गरे मतदान
भञ्ज्याङ न्यूज
तनहुँमा प्रतिनिधिसभा र प्रदेशसभा सदस्य निर्वाचनको मतदान कार्य बिहान ७ बजेबाटै उत्साहपूर्ण रुपमा सुरु भएको छ ।
तनहुँका २ वटा निर्वाचन क्षेत्रमा रहेका १४२ वटै मतदान स्थलमा कायम गरिएका ३०५ मतदान केन्द्रमा बिहान सातबाजेबाटै मतदान कार्य सुरु भएको मुख्य निर्वाचन अधिकृत दल बहादुर केसीले जानकारी गराए ।
तनहुँ क्षेत्र नम्बर १ का प्रतिनिधिसभा सदस्य उम्मेदवार रामचन्द्र पौडेल, एकबहादुर राना र गोविन्दराज जोशीले आ-आफ्नो मतदान केन्द्रबाट बिहान ७ बजेनै मतदान गरेका छन् ।
नेपाली कांग्रेसका तर्फाट उम्मेदवार पौडेलले व्यास-२ सत्यवती मावि, नेकपा एमालेका तर्फाट रानाले भानु-३ स्थित मतदान केन्द्र र जोशीले भानु-११ रुपाकोटमा रहेको मतदान केन्द्रबाट मतदान गरेका छन् ।
यस्तै, तनहुँ क्षेत्र नम्बर २ का प्रतिनिधिसभा सदस्य उम्मेदवार किरण गुरुङले मतदान गरेका छन् । नेकपा एमालेका स्थायी कमिटी सदस्य एवं पूर्वमन्त्री गुरुङले भिमाद नगरपालिका-९ स्थित भिमाद सामुदायिक भवनबाट मतदान गरेका हुन् । मतदानपछि गुरुङले तनहुँ क्षेत्र नम्बर २ मा एमालेको जित निश्चित रहेको बताएका छन् ।
बाम-लोकतान्त्रिक गठाबन्धनबाट उम्मेदवार बनेका नेपाली कांग्रेसका केन्द्रीय सदस्य शंकर भण्डारीले यो निर्वाचनमा आफैलाई मतदान गर्न नपाउने भएका छन् । उनको मतदाता नामावली तनहुँ-१ को भानु नगरपालिकामा रहेको र उनि तनहुँ-२ बाट उम्मेदवार बनेका छन् ।
यस्तै, अन्य राजनीतिक दलका उम्मेदवारहरुले पनि आ-आफ्नो मतदान केन्द्रबाट मतदान गरेका छन् । प्रदेशसभा सदस्यका उम्मेदवारहरुले पनि आ-आफ्नो मतदान केन्द्रबाट मतदान गरिसकेका छन् ।
निर्वाचनलाई शान्तिपूर्ण, भयरहित, मर्यादित र निष्पक्षरूपमा सम्पन्न गर्नका लागि निर्वाचन आयोगबाट जारी आचारसंहितालाई पालना गर्दै निर्वाचन सम्पन्न गराउन आ-आफ्नो क्षेत्रबाट सहयोग गर्ने राजनीतिक दलहरुले प्रतिवद्धता जनाइएका छन् ।
तनहुँमा कायम गरिएका १४२ वटा मतदान स्थललाई तीन वर्गमा वर्गीकरण गरी आवश्यक सुरक्षा व्यवस्थापन गरिएको प्रमुख जिल्ला अधिकारी विश्वप्रकाश अर्यालले बताउनु भएको छ ।
तनहुँका ६ वटा मतदान स्थल अतिसंवेदनशिल, ५२ वटा मतदान स्थल संवेदनशिल र ८४ वटा मतदान स्थललाई सामान्यमा वर्गीकरण गरिएको छ । निर्वाचनका लागि ३३३ जना सशस्त्र प्रहरी, ४८६ जना नेपाली सेना, ७७८ जना नेपाल प्रहरी र १ हजार ३९२ जना म्यादी प्रहरी खटाइएको छ ।
तनहुँको १० स्थानीय तहका ८५ वटा वडामा रहेका ३०५ मतदान केन्द्रबाट २ लाख ४८ हजार ४९५ जना मतदातालाई मतदान गरनाउनका लागि २ हजार ४४० जना कर्मचारी खट्टएिका छन् ।
