बाख्रा फार्ममा भएको आगलागि चार घण्टापछि नियन्त्रण, ६० लाख बराबरको क्षति
भञ्ज्याङ न्यूज
तनहुँको बन्दिपुर गाउँपालिका-५ याम्पा स्थित कुमालटारी बाख्रा फार्ममा आगलागि हुँदा करिब ६० लाख रुपैयाँ बराबरको क्षति भएको छ । स्थानीय तीन जना कृषकले सञ्चालन गरेको कृषि फार्ममा विहीबार दिउँसो करिब २ बजेको समयमा आगोलागि भएको थियो ।
आधुनिक बाख्राको खोर निर्माणका क्रममा विद्युत सर्ट भएर आगलागि भएको वडा अध्यक्ष ध्रुव लामिछानेले बताए । कृषि फार्ममा करिब १२० वटा बाख्रा र २०० वटा कुखुरा पाल्दै आइएको थियो । वडा अध्यक्ष लामिछानेका अनुसार दिउँसोको समयमा आगोलागि भएको हुँदा खोरमा रहेका बाख्रालाई बाहिर निकाल्न सफल भएपनि केही कुखुरा भने जलेका छन् ।
कृषकहरु चेतप्रसाद तिवारी, कुलप्रसाद तिवारी र विष्णु अम्गाईले संयुक्त रुपमा उक्त कृषि फार्म सञ्चालन गर्दै आएका थिए । करिब दुइ करोड रुपैयाँ लगानि गरिएको उक्त कृषि फामलाई आधुनिक बनाउने गरी काम सञ्चालन भइरहेको कृषकहरुले बताएका छन् ।
विद्युत लाइनको प्रयोग गरी काम भइरहेको स्थानमा पराल राखिएको र उक्त परालमा अचानक आगो सल्कन गएको बताइएको छ । राजमार्ग स्तरोन्नतीको काममा खट्टएिका पानी ट्याङकर, बन्दिपुर गाउँपालिका र व्यास नगरपालिकाको दमकल, स्थानीय, सशस्त्र प्रहरी तथा नेपाल प्रहरीको सहयोगमा करिब चार घण्टा पछि आगो नियन्त्रणमा लिएको थियो ।
उक्त आगलागिबाट कृषि फार्ममा रहेका बाख्रा तथा कुखुराको खोर ८० प्रतिशत भन्दा बढि जलेर काम नलाग्ने अवस्थामा पुगेको कृषक चेतप्रसाद तिवारीले बताएका छन् । आगलागिबाट भएको क्षतिको पूर्ण विवरण बाँकी रहेको तनहुँ प्रहरीले जनाएको छ ।
