१५ वर्षपछि दमौलीमा नेपाल जेसीज क्षेत्र ‘ख’ सम्मेलन, पर्यटन प्रवर्द्धन मुख्य एजेन्डा
तनहुँको सदरमुकाम दमौलीमा आगामी भदौ १४ र १५ गते युवाहरुको अन्तर्राष्ट्रिय संस्था नेपाल जेसीजको क्षेत्र ‘ख’ सम्मेलन गरिने भएको छ । जेसीआई व्यास नगरको संयोजनमा हुन लागेको सम्मेलन करिब १५ वर्षपछि दमौलीमा आयोजना हुन लागेको हो ।
आयोजकको भनाइमा यस पटक सम्मेलनलाई आधुनिक ढाँचामा प्रस्तुत गर्दै तनहुँ जिल्लाको पर्यटन, संस्कृति र धार्मिक सम्पदाको प्रचार–प्रसारलाई मुख्य एजेन्डा बनाइएको छ ।
सम्मेलन निर्देशक सुरेश पुरीका अनुसार दुई दिनसम्म चल्ने कार्यक्रममा नेपाल जेसीजका वैधानिक विषयमा छलफल हुने मात्र होइन, स्थानीय होटल, पर्यटन र व्यवसायलाई प्रत्यक्ष लाभ हुने खालका गतिविधि सञ्चालन गरिनेछ । उनले भने, “सम्मेलनले तनहुँको धार्मिक, ऐतिहासिक र सांस्कृतिक परिचयलाई नयाँ ढंगले प्रस्तुत गर्ने अवसर मिल्नेछ ।”
कार्यक्रममा नेपाल जेसीज क्षेत्र ‘ख’ अन्तर्गतका ४२ शाखाका प्रतिनिधि, राष्ट्रिय तथा क्षेत्रीय पदाधिकारी, पूर्व अध्यक्षहरु, अन्य क्षेत्रका शाखा र जुनियर जेसीजका पदाधिकारी सहभागी हुने अपेक्षा गरिएको छ ।
सम्मेलनमा सचिव माधव न्यौपानेका अनुसार कला–संस्कृति प्रदर्शनी, प्रकरण गोष्ठी, प्रशिक्षण सत्र, स्थानीय सम्पदाको अवलोकन भ्रमणलगायत विविध कार्यक्रम समावेश गरिएको छ ।
सम्मेलनका प्रवक्ता कृष्ण सुनार र जेसीआई व्यास नगर अध्यक्ष सुमित ढुंगानाले तयारी अन्तिम चरणमा पुगेको जनाउँदै यसले जिल्लामा पर्यटन आगमन मात्र नभई व्यवसायिक गतिविधिलाई समेत गतिशील बनाउने विश्वास व्यक्त गरेका छन् ।
१५ वर्षपछि दमौलीमा फर्किएको सम्मेलनलाई यसपटक भव्य र व्यवस्थित बनाउनका लागि तनहुँको पर्यटकीय सम्पदा– देवघाट, बन्दीपुर, ऋषिङ्गडाँडा, सेती–मादी किनार र अन्य ऐतिहासिक स्थललाई सम्मेलनमार्फत सहभागीहरूसमक्ष प्रस्तुत गर्ने तयारी गरिएको छ ।
