चितवनको मिनी म्याराथनमा तनहुँको निर्मल माविका दुइ छात्राले सातौ र नवौ स्थान प्राप्त गरी पुरस्कृत
भञ्ज्याङन्यूज
रोटरी क्लब अफ रत्ननगरले आयोजना गरेको रोटरी मिनी म्याराथनमा तनहुँको दमौली स्थित निर्मल माध्यमिक विद्यालयका दुइ छात्रा पनि पुरस्कृत हुन सफल भएका छन् ।
महिलातर्फको पाँच किमी दौड प्रतियोगितामा सहभागि भएका निर्मल माविका छात्राहरु व्यास-१० दुम्सीचौरकी मेनुका गुरुङले सातौ स्थान र भानु-१२ आहालेकी सन्ध्या अधिकारीले नवौं स्थानमा दौडा पुरा गर्न सफल भएका थिए । प्रतियोगितामा गुरुङ र अधिकारीलाई नगद २ हजार रुपैयाँ, मेडल, प्रमाणपत्रद्वारा पुरस्कृत गरिएको छ ।
यस्तै, उक्त प्रतियोगिताको महिलातर्फको पाँच किमी दौडमा सशस्त्रकी फूलमती राना प्रथम भएकी छन् । उनले निधारित दूरी १८ मिनेट १६ सेकेण्डमा पार गरेकी थिइन् । उनलाई रु २० हजार, चाँदीको मेडल र प्रमाणपत्रले सम्मान गरिएको थियो ।
दोस्रो भएकी त्रिभुवन आर्मीकी सुनसरी रोकायाले १८ मिनेट २७ सेकेण्डमा दूरी पार गरिन । उनले नगद रु १० हजार, चाँदीको मेडल र प्रमाणपत्र प्राप्त गरेकी छन् ।
सशस्त्रकी आशा राउत तेस्रो भइन । उनले निर्धारित दूरी १८ मिनेट ३३ सेकेण्डमा पार गरिन । उनलाई रु पाँच हजार, चाँदीको मेडल र प्रमाणपत्र प्रदान गरिएको छ ।
सशस्त्रकै सीमा चौधरी चौथो भएकी छन् । उनले रु तीन हजार, मेडल र प्रमाणपत्र प्राप्त गरिन । पाँचौँ स्थानमा रहेकी स्मिता बुढाले रु दुइ हजार पाँच सय, मेडल र प्रमाणपत्र प्राप्त गरेकी छन् ।
यस्तै, छैटौँ स्थानदेखि १०औँ स्थानसम्म रहने क्रमशः अस्मिता भुजेल, वर्षा ओली र लक्षिमा डाँगीले रु एक हजार, प्रमाणपत्र र मेडल प्राप्त गरेका छन् ।
मिनी म्याराथनको उपाधि त्रिभुवन आर्मीका पाललाई
रोटरी क्लब अफ रत्ननगरले आयोजना गरेको पुरुष तर्फको रोटरी मिनी म्याराथनको उपाधि त्रिभुवन आर्मी क्लबका मुकेशबहादुर पालले हात पारेका छन् । उनले निर्धारित दूरी १५ दशमलव चार किलोमिटरको दूरी ४६ मिनेट ३८ सेकेण्डमा पार गरेका थिए ।
नारायणगढस्थित नारायणी नदी किनारबाट सुरु भएको दौड रत्ननगरको हरिहर मन्दिर पुगेर टुङ्गएिको थियो । पाललाई उपाधिसँगै नगद रु एक लाख, चाँदीको मेडल र प्रमाणपत्रसहित सम्मान गरियो ।
प्रतियोगितामा दोस्रो स्थानमा त्रिभुवन आर्मीकै सञ्जय श्रेष्ठ भए । उनले निर्धारित दूरी ४६ मिनेट ४१ सेकेण्डमा पार गरेका थिए । उनलाई रु ५० हजार, चाँदीको मेडल र प्रमाणपत्रसहित सम्मान गरिएको छ ।
जुम्लाका दुर्गाबहादुर बुढाले ४६ मिनेट ४२ सेकेण्डमा निर्धारित दूरी पार गर्दै तेस्रो भएका छन् । उनलाई रु २५ हजार, चाँदीको मेडल र प्रमाणपत्रले सम्मान गरिएको छ ।
त्रिभुवन आर्मीका टंक कार्की चौथो र सुवास कार्की पाँचौं भए । उनहरुलाई क्रमशः रु १० हजार र पाँच हजार प्रदान गरिएको छ । छैटौंदेखि १०औं स्थानसम्म क्रमशः नागेश्वर अहिर, प्रेमबहादुर बस्नेत, राजेन्द्र तामाङ, खिमबहादुर खत्री र धनु मानन्धर भएका थिए । उनिहरुलाई जनही रु तीन हजार प्रदान गरिएको छ ।
खुल्लातर्फ चेपाङ समुदायका धावकलाई नगद रु दुइ हजार र महिलातर्फ दूरी पार गर्ने रु एक हजारसहित सम्मान गरिएको थियो । उनीहरुलाई रोटरी डिष्ट्रिक ३२९२ का गभर्नर राजेन्द्रप्रसाद ध्वजुले सम्मान गरे ।
क्लबका अध्यक्ष हरिकुमार श्रेष्ठको अध्यक्षतामा सम्पन्न कार्यक्रममा मिस नेपाल इन्टरनेशनल २०२२ न्यान्सी खड्का, कार्यक्रम संयोजक विपिन पोख्रेललगायतले भनाइ राखेका थिए ।
प्रतियोगिताको उद्घाटन भरतपुर महानगरपालिका प्रमुख रेनु दाहालले नारायणी नदी किनारमा गरेकी थिइन् । उनले भरतपुर भ्रमण वर्षलाई टेवा पुर्याउन यस्ता कार्यक्रम महत्त्वपूर्ण रहेको बताइन ।
प्रतियोगितामा ७६५ धावकले सहभागिता जनाएका थिए । जसमध्ये खुलातर्फ ४९४ जनाको सहभागिता थियो । महिलातर्फ २७१ जनाले सहभागिता जनाए । जसमध्ये खुलातर्फ ६८ र चेपाङ समुदायका धावक र महिलातर्फ ५४ जनाले सहभागिता जनाएको कार्यक्रमका संयोजक पोख्रेलले जानकारी दिए ।
