तनहुँमा धान जोनको क्षेत्रफल वृद्धि
दमौली : तनहुँमा धान जोनको क्षेत्रफलमा वृद्धि भएको छ । धानखेतीतर्फ किसानलाई आकर्षित गराउने उद्देश्यसहित सञ्चालित धान जोनमा २३ प्रतिशतले वृद्धि भएको राष्ट्रिय कृषि आधुनिकीकरण कार्यक्रम एकाइले जनाएको छ ।
व्यास नगरपालिका–८, ९, ११, भानु नगरपालिका र बन्दीपुर गाउँपालिका–१ मा धान जोन कार्यक्रम सञ्चालनमा रहेको एकाइका वरिष्ठ कृषि अधिकृत पूर्ण ढुङ्गानाले जानकारी दिए । अघिल्लो वर्ष ५०० रोपनी क्षेत्रफलमा धान जोन कार्यक्रम सञ्चालन रहेकामा गतवर्ष ६१५ रोपनी क्षेत्रफल पुगेको ढुङ्गानाले बताए ।
आर्थिक वर्ष २०८०/८१ मा ५१० रोपनी क्षेत्रफलमा धान जोन सञ्चालन रहेकामा दुई हजार ७५४ किलो धान उत्पादन भएको थियो । आर्थिक वर्ष २०८१/८२ मा छ ६१५ रोपनी क्षेत्रफलमा विस्तार हुँदा तीन हजार ३८२ किलो धान उत्पादन भएको छ ।
धेरै धान उत्पादन हुने क्षेत्र पहिचान गरी यहाँका किसानलाई आबद्ध गराएर धान जोन कार्यक्रम सञ्चालन भइरहेको छ । एकाइले गत आर्थिक वर्षमा किसानलाई ५०० किलो हर्दीनाथ हाइब्रिड धानसँगै अन्य कृषिजन्य सामग्री एवं औजारसमेत वितरण गरेको छ ।
ढुङ्गानाका अनुसार किसानलाई ५० प्रतिशत अनुदानमा धानको उन्नत बीउ वितरण गरिएको थियो । धान जोनमा आबद्ध किसानलाई ११० क्विन्टल विभिन्न जातका धानका उन्नत बीउ वितरण गरिएको उहाँले बताउनुभयो । त्यसका लागि रु ५७४ हजार बजेट विनियोजन गरिएकामा रु चार लाख दुई हजार खर्च भएको छ ।
धान जोन कार्यक्रमबाट ५६० महिला र ४५८ पुरुष गरी एक हजार १८ जना लाभान्वित भएका छन् । त्यसमध्ये ५२ दलित, ४०५ जनजाति, ५६१ र ३०५ पाँच जना युवा छन् ।
