भानुमा शिक्षकहरु बीच मैत्रीपूर्ण भलिबल प्रतियोगिता
भानु : तनहुँको भानु नगरपालिकामा शिक्षकहरु बीच मैत्रीपूर्ण भलिबल प्रतियोगिता सञ्चालन गरिएको छ । भानु नगरपालिकाको १०औं स्थापना दिवसका अवसर भानु नगरस्तरीय खेलकुद विकास समतिले अन्तर विद्यालय नगरस्तरीय शिक्षक मैत्रीपूर्ण भलिबल प्रतियोगिता आयोजना गरेको हो ।
भानु नगरस्तरीय खेलकुद विकास समितिका अध्यक्ष तुलकुमार गुरुङको अध्यक्षता आयोजित प्रतियोगिताको नगर प्रमुख आनन्दराज त्रिपाठीले मंगलबार भलिबल खेलमा सर्भिस गरेर शुभारम्भ गरेका थिए ।
प्रतियोगितामा रेफ्रीको भूमिकामा नेपाली सेना रुरु भैरब दल गण हात्तीचौर ब्यारेकका जवान द्वय लोकेन्द्र घर्ती मगर (सुर्खेत) र विष्णु थापा मगर (स्याङ्जा) रहेको भानुका नगर शिक्षा अधिकारी ध्रुवराज पौडेलले जानकारी गराए ।
प्रतियोगिताको पहिलो दिन मंगलबार १० वटा खेल सम्पन्न भएका छन् । १४ वटा टिमको सहभागिता रहेको प्रतियोगिता नकआउट सिस्टमबाट खेलाइएको र पहिलो चरणबाट ७ वटा टिम छनौट भएका शिक्षा अधिकारी पौडेलले बताए ।
प्रतियोगिताको पहिलो चरणमा श्री सरस्वती मन्दिर मावि भानु १२ घलेछाप, श्री विद्यानिकुञ्ज मावि भानु १२ वयापानी, श्री मनोहर मावि भानु ८ महन्तेहटिया, कर्मदा मावि भानु ९ पुर्कोट वाइसजङघार, प्रभात मावि भानु ६ सिमपानी, अरनिको मावि भानु १३ मिर्लुङ ठूलोढुङ्गा, श्री होमराज लोहनी शारदा शिक्षा सदन मावि भानु २ नारेश्वरटार रहेका छन् ।
दोस्रो चरण (क्वाटरफाइनल) का खेलबाट श्री कर्मदा मावि भानु ९ पुर्कोट वाइसजङघार, श्री अरनिको मावि भानु १३ मिर्लुङ ठूलोढुङ्गा, श्री मनोहर मावि भानु ८ महन्तेहटिया, श्री सरस्वती मन्दिर मावि भानु १२ (वाइमा परेको) छनोट भएका छन् ।
सेमिफाइनल पहिलो खेलमा श्री अरनिको मावि भानु १३र श्री सरस्वती मन्दिर मावि भानु १२, दोश्रो खेल श्री कर्मदा मावि भानु ९ र श्री मनोहर मावि भानु ८ बीच हुने भएको छ । यो खेलका विजेता टीमहरू बीच फाइनल खेल हुनेछ । दुबै खेलका उपविजेता टिमहरू बीच पुनः तेस्रो स्थानका लागि प्रतिस्पर्धा गराइने छ । विजेताले तेस्रो स्थान प्राप्त गर्नेछ भने उपविजेताले सान्त्वना स्थान प्राप्त गर्नेछ ।
प्रतियोगिताको प्रथम, द्वितीय, तृतीय र सान्त्वना स्थान प्राप्त गर्ने टिमलाई क्रमशः रु २० हजार, रु १५ हजार, रु १० हजार र रु ५ हजार नगद, मेडल र प्रमाणपत्र प्राप्त गर्नेछन् । विजेता विद्यालयले पनि प्रमाणपत्र प्राप्त गर्नेछ । प्रतियोगिताको उत्कृष्ट खेटाडीले नगद रु २ हजार सहित मेडल प्राप्त गर्नेछ ।
