कृषकको खेतबारीमै पुगेर संयुक्त प्राविधिक अनुगमन
तनहुँ : कृषि विकास कार्यालय, तनहुँको आयोजनामा मंगलबार म्याग्दे, बन्दीपुर र आँबुखैरेनी गाउँपालिकाका विभिन्न स्थानहरूमा संयुक्त प्राविधिक समूह अनुगमन कार्यक्रम गरिएको छ ।
कृषि भूमि व्यवस्था तथा सहकारी मन्त्रालय, प्रदेश कृषि प्रयोगशाला, कृषि अनुसन्धान केन्द्र तथा कृषि विकास कार्यालय, तनहुँका विज्ञ प्राविधिक कर्मचारीहरूको संयुक्त टोलीले कृषकको खेतबारीमै पुगेर स्थलगत अनुगमन गरेको थियो ।
उक्त कार्यक्रममा कृषकहरूले भोग्दै आएका माटो परीक्षण, रोग–कीरा नियन्त्रण, उन्नत बिउ–बिरुवा छनोट, सिँचाइ व्यवस्थापन लगायतका विद्यमान समस्याहरूलाई स्थलगत रूपमै पहिचान गरी तत्काल समाधानका उपाय र आवश्यक प्राविधिक पृष्ठपोषण प्रदान गरिएको थियो ।
कृषकको खेतबारीमै विज्ञ टोली पुगेर समस्या बुझ्दा कृषकहरू उत्साहित देखिएका थिए । कार्यालयका अनुसार यस्तो संयुक्त अनुगमनले अनुसन्धान, प्रयोगशाला र फिल्डको प्राविधिक ज्ञानलाई एकै ठाउँमा जोडेर कृषकलाई छिटो, प्रभावकारी तथा व्यवहारिक सेवा दिन सहयोग पुग्ने विश्वास गरिएको छ ।
कृषि विकास कार्यालय, तनहुँले आगामी दिनमा पनि जिल्लाका अन्य पालिकाहरूमा यस्ता स्थलगत प्राविधिक सेवा अभियानलाई निरन्तरता दिने जनाएको छ ।
