घर–आँगनबाटै डेंगी नियन्त्रण गर्न तनहुँको भिमादमा अभिमुखीकरण
भिमाद : डेंगी रोगको संक्रमण बढ्न नदिन घर–आँगनदेखि समुदायस्तरसम्म सरसफाइ र लामखुट्टेको प्रजननस्थल नष्ट गर्नुपर्नेमा स्वास्थ्यकर्मीले जोड दिएका छन् । तनहुँको भिमाद नगरपालिकाको स्वास्थ्य शाखाले आयोजना गरेको डेंगी रोग नियन्त्रण तथा रोकथामसम्बन्धी अभिमुखीकरण कार्यक्रममा स्वास्थ्यकर्मीले यस्तो बताएका हुन् ।
कार्यक्रममा भिमाद प्राथमिक उपचार केन्द्रका प्रमुख सुदन अधिकारीले डेंगी नियन्त्रणका लागि सरकारी निकायको प्रयास मात्र पर्याप्त नहुने भन्दै समुदायको सक्रिय सहभागिता आवश्यक रहेको बताए ।
डेंगी सार्ने लामखुट्टेले घर, आँगन, टोल तथा सार्वजनिक स्थानमा जमेको सफा पानीमा समेत प्रजनन गर्ने भएकाले पानी जम्नसक्ने सम्भावित स्थान पहिचान गरी नियमित रूपमा नष्ट गर्नुपर्ने उनको भनाइ थियो ।
मेडिकल अधिकृत डा. निराजन विक्रम सिंह सुनारले डेंगीका लक्षण, संक्रमणबाट बच्ने उपाय तथा उपचारमा अपनाउनुपर्ने सावधानीबारे जानकारी गराएका थिए । ज्वरो आउने, टाउको दुख्ने, आँखाको पछाडिको भाग दुख्ने, शरीर तथा जोर्नी दुख्ने, वाकवाकी लाग्नेलगायतका लक्षण देखिएमा स्वास्थ्यकर्मीको परामर्श लिन उनले आग्रह गरे ।
अभिमुखीकरणमा पानी राख्ने भाँडा नियमित सफा गर्ने, धाराका ट्यांकी तथा अन्य पानीका भाँडा ढाकेर राख्ने, गमला, पुराना टायर, बोतललगायतमा पानी जम्न नदिने र घरवरपर सरसफाइमा ध्यान दिनुपर्ने विषयमा जानकारी दिइएको थियो । लामखुट्टेको टोकाइबाट बच्न पूरा बाहुला भएका कपडा लगाउने तथा आवश्यक सावधानी अपनाउनसमेत सहभागीलाई सुझाव दिइएको थियो ।
कार्यक्रममा वडा सदस्य, टोल विकास समितिका पदाधिकारी तथा सदस्य, महिला स्वास्थ्य स्वयंसेविका, महिला समूहका सदस्य, स्थानीय अगुवा तथा सर्वसाधारणको सहभागिता थियो ।
सहभागीलाई घरदेखि समुदायसम्म डेंगी नियन्त्रणका लागि सरसफाइमा ध्यान दिन, लामखुट्टेको बासस्थान पहिचान गरी नष्ट गर्न तथा डेंगीसम्बन्धी गलत धारणा हटाउँदै सही सूचना समुदायमा पु¥याउन आग्रह गरिएको थियो ।
नगरपालिकाले आगामी दिनमा आवश्यकता अनुसार समुदायस्तरमा डेंगीसम्बन्धी सचेतना तथा लामखुट्टेको प्रजननस्थल खोजी–नष्ट गर्ने अभियानलाई निरन्तरता दिने जनाएको छ ।
