तनहुँ जलविद्युत् आयोजनामा विपद् नमुना अभ्यास
कामदारको सुरक्षा र आपत्कालीन प्रतिकार्य क्षमता अभिवृद्धिमा जोड
तनहुँ । तनहुँ जलविद्युत् आयोजनाले निर्माणका क्रममा हुन सक्ने सम्भावित विपद्को जोखिम न्यूनीकरण तथा कामदारको सुरक्षा सुनिश्चित गर्न विपद् नमुना अभ्यास सम्पन्न गरेको छ ।
आयोजनाको नदी सुरक्षा व्यवस्थापन योजनाअन्तर्गत आपत्कालीन प्रतिकार्य उपयोजनाबमोजिम शुक्रबार मुख्य बाँध निर्माणस्थलमा अभ्यास सञ्चालन गरिएको हो ।
अभ्यासमा प्याकेज १ र प्याकेज २ अन्तर्गत कार्यरत जनशक्तिलाई लक्षित गरी विपद्का बेला अपनाउनुपर्ने सुरक्षा सावधानी, उद्धार प्रक्रिया तथा सुरक्षित स्थानमा पुग्ने विधिबारे व्यावहारिक अभ्यास गरिएको थियो ।
कार्यक्रममा तनहुँ हाइड्रोपावर लिमिटेडका प्रबन्ध–सञ्चालक, आयोजना प्रबन्धकसहित उच्च पदस्थ अधिकारी, नेपाली सेनाको कालीभञ्जन गणका प्रतिनिधि, आयोजना सुपरीवेक्षण परामर्शदाता, वातावरण तथा सामाजिक व्यवस्थापन सेवा प्रदायक र निर्माण व्यवसायीका प्रतिनिधिहरूको सहभागिता रहेको थियो ।
निर्माणस्थलमा सम्भावित विपद्को पूर्वतयारी, उद्धार तथा आपत्कालीन प्रतिकार्य क्षमता अभिवृद्धि गर्न यस्ता अभ्यास प्रभावकारी हुने अपेक्षा गरिएको छ । यसले निर्माणमा संलग्न जनशक्तिको सुरक्षा सुनिश्चित गर्न र विपद्का बेला हुन सक्ने मानवीय तथा भौतिक क्षति न्यूनीकरण गर्न आयोजनाको प्रतिबद्धतालाई थप सुदृढ बनाउने विश्वास गरिएको छ ।
