ज्यान मुद्दाका फरार प्रतिवादी सहित १३ जना पक्राउ

जिल्ला प्रहरी कार्यालयले ज्यान मुद्दाका फरार प्रतिवादीलाई १५ वर्षपछि पक्राउ गरेको छ । यी सहित प्रहरीले १३ जनालाई पक्राउ गरेको हो । विभिन्न अपराध एवं मुद्दाहरुमा संलग्न रही फरार रहेका तथा अदालतबाट फैसला भई दण्ड, जरिवाना, दसौदी, कोर्ट फि र सरकारी बिगो समेत तिर्न बाँकी भएका व्यक्तिहरुको खोजी गर्ने अभियान अन्तरगत उनिहरुलाई पक्राउ गरिएको तनहुँ प्रहरीले जनाएको छ ।

तनहुँ प्रहरीले कर्तव्य ज्यान मुद्दामा बिगत १५ बर्षदेखि फरार रहेकी तनहुँको साबिक ढोरफिर्दी गाविस-६ स्थायी घर भई हाल रुपन्देहीको देवदह नगरपालिका-२ ढेकार बस्ने बर्ष ६० की ज्ञानुमाया नेपालीलाई पक्राउ गरिएको प्रवक्ता प्रहरी नायव उपरीक्षक युवराज तिमिल्सिनाले जानकारी गराएका छन् । पक्राउ परेकी नेपाली उपर सर्वोच्च अदालतको वि.सं. २०६२ साउन ११ गतेको फैसलाले १० बर्ष कैद सजाय सुनाएकोमा तोकिएको कैद सजाय भुक्तान नगरी हालसम्म फरार रहेकी थिइन ।

यस्तै, कर्तव्य ज्यान मुद्दामा बिगत २७ बर्षे देखी फरार रहेका तनहुँ भानु-१० बस्ने बर्ष ५२ को कुमार पन्थ भन्ने कुमार देव पन्त उपर तनहुँ जिल्ला अदालतको वि.सं. २०५५ असार ३ गतेको फैसलाले १५ महिना कैद सजाय तोकिएकोमा उक्त कैद भुक्तान नगरी हालसम्म फरार रहेकाले पक्राउ गरिएको छ । प्रहरीले नाता कायम मुद्दामा फरार रहेका २ जना, सम्बन्ध बिच्छेद मुद्दामा फरार रहेका ४ जना, लेनदेन मुद्दामा फरार रहेका २ जना, हातहतियार मुद्दामा फरार रहेका १ जना, कर्तव्य ज्यान मुद्दामा फरार रहेका १ जना र सवारी ज्यान मुद्दामा फरार रहेका १ जना गरी जम्मा १३ जनालाई जिल्ला प्रहरी कार्यालय तनहुँ तथा मातहत प्रहरी इकाई कार्यालयहरुबाट पक्राउ गरिएको प्रवक्ता तिमिल्सिनाले बताए ।

पक्राउ परेकाहरुबाट तोकिएको २१ बर्ष ५ महिना कैद र २ हजार १८० रुपैयाँ जरिवाना भुक्तानका लागि तनहुँ जिल्ला अदालतमा उपस्थित गराइएको बताइएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर