भ्रष्टाचारमा तनहुँ प्रदेशकै दोस्रो, व्यासको सबै भन्दा धेरै भ्रष्टाचारजन्य उजुरी
सविन लामिछाने/तनहुँ
भ्रष्टाचार हुने जिल्लाको सूचीमा तनहुँ गण्डकी प्रदेशमा दोस्रो स्थानमा देखिएको छ । आर्थिक वर्ष २०७८/०७९ मा अख्तियार दुरुपयोग अनुसन्धान आयोग कार्यालय पोखरामा परेका उजुरीका आधारमा गण्डकी प्रदेशको ११ जिल्लामध्ये तनहुँ भ्रष्टाचार हुने दोस्रो जिल्लाका रुपमा सूचीकृत भएको हो ।
जिल्लाबाट गत आर्थिक वर्षमा ५८ भ्रष्टाचारका उजुरी आयोगको कार्यालयमा परेका आयोगको प्रमुख पार्वती शर्माले जानकारी दिईन् । उनको अनुसार चालु आर्थिक वर्षमा पनि १८ भ्रष्टाचारका उजुरी आयोगको कार्यालयमा परिसकेको छ ।
भ्रष्टाचारका उजुरीमध्ये आर्थिक वर्षमा मात्र ४ उजुरी फछ्र्यौट भइसकेका छन् भने गएको आर्थिक वर्षको ५८ र यस आर्थिक वर्षका १४ उजुरी गरी कुल ७२ उजुरीको अनुसन्धान भइरहेको उनले बताईन् । जिल्लाका ८ स्थानीय तहमा मात्रै ७२ भ्रष्टाचारजन्य उजुरी परेका छन् । जसमा सबै भन्दा धेरै व्यास नगरपालिकाको रहेका छन् ।
व्यास नगरपालिकाको २४, भानु नगरपालिकाको १३, शुक्लागण्डकी नगरपालिकाको १२, ऋषिङ गाउँपालिकाको ८ देवघाट गाउँपालिकाको ६, बन्दिपुर गाउँपालिकाको ५, भिमाद नगरपालिकाको ३ र घिरिङ गाउँपालिकाको १ भ्रष्टाचारजन्य उजुरी परेको छ ।
स्थानीय तहले नदीजन्य वस्तुको निकासी तथा जथाभावी दोहन, दोहोरो-तेहोरो भुक्तानी र बिनाकाम भुक्तानी गर्ने, घर नक्सा तथा बाटो, अन्य सिफारिशमा अनियमितता गरेको, करारमा कर्मचारी नियुक्ति गर्दा अनियमितता गरेको, जथाभावी भत्ता सुविधा लिने गरेको उजुरी कार्यालयमा परेका छन् ।
त्यस्तै भौतिक पूर्वाधारतर्फ आर्थिक वर्षको अन्त्यमा काम गर्ने, बढी सामान खरीद गर्ने, लागत स्टिमेट तयारीमा बदनियतपूर्ण तरिकाले गर्ने, नक्कली बिल भरपाइ बनाई भुक्तानी दिने तथा ठेकेदार र प्राविधिकसंग अवाञ्छित गतिविधि गर्ने र हिस्सेदारी खोज्नेजस्ता विषयमा आयोगमा उजुरी परेको जनाइएको छ ।
शिक्षा, स्वास्थ्यतर्फ भवन निर्माण, शौचालय निर्माण, नक्कली प्रमाणपत्र, विद्यालयको जग्गा बेचबिखन लगायतका उजुरी आयोगमा परेका छन् । आर्थिक वर्ष ७८/७९ मा अख्तियार दुरुपयोग आयोगबाट जिल्ला प्रशासन कार्यालय तनहुँमा १८ वटा उजुरी प्राप्त भएको छ ।
जसमा नदीजन्य पदार्थको उत्खनन्मा चार, सार्वजनिक जग्गा अतिक्रमणमा दुइ, आर्थिक अनियमितामा नौ, र्सार्वजनिक सम्पत्ति दुरुपयोगमा १, दोहोरो नागरिकतामा १ र नियम विपरित करमा १ गरी कुल १८ उजुरी प्राप्त भएको प्रमुख जिल्ला अधिकारी विश्वप्रकाश अर्यालले जानकारी दिए ।
उनका अनुसार प्राप्त उजुरी मध्ये ९ उजुरीको फछ्र्यौट भएको र बाँकीको अनुसन्धान भईरहेको छ । बढी भ्रष्टाचार हुने जिल्लाको सूचीमा कास्की पहिलो स्थानमा छन् । तनहुँ पछि क्रमशः पर्वत, स्याङजा, बागलुङ, गोरखा, म्याग्दी, लमजुङ, मनाङ र मुस्ताङ रहेका छन् । नवलपरासीको भने शुन्य रहेको आयोगले जनाएको छ ।
