ग्रामीण क्षेत्रको विकास तथा प्रवर्द्धनका लागि आदिकवि भानुभक्त क्याम्पस तनहुँको ‘मितेरी गाउँ’ कार्यक्रम
तनहुँको दमौली स्थित आदिकवि भानुभक्त क्याम्पसले मितेरी गाउँ कार्यक्रम अगाडि ल्याएको छ । ग्रामीण क्षेत्र र विशेष गरी न्यून आयस्तर भएका वर्ग र समुदायका विद्यार्थीलाई आफ्नै घरदैलोमा सहज रुपमा उच्च शिक्षा अध्ययन अध्यापन गराउँदै आएको क्याम्पसले ग्रामीण क्षेत्रको विकास तथा प्रवर्द्धनका लागि मितेरी गाउँ कार्यक्रम अगाडि ल्याएको हो ।
क्याम्पसको मितेरी गाउँ कार्यक्रम अन्तर्गत ऋषिङ गाउँपालिका-३ दुबुङ गाउँका बासिन्दासंग छलफल तथा अन्तरक्रिया गरेको छ । करिव चार दशक अघिदेखि सदरमुकाम दमौलीमा स्थापना भई उच्च शिक्षा प्रदान गर्दै आएको क्याम्पसले जिल्लाको पर्यटकीय सम्भावनायुक्त कुनै एक गाउँ छनोट गरी मितेरी सम्बन्ध जोड्ने भएको छ ।
ग्रामीण भेगको शिक्षा, स्वास्थ्य, वन तथा वातावरणका साथै स्थानीय मौलिक कलासंस्कृति र खाद्यवस्तुहरुको संरक्षण एवं विकासगरी स्थानीय समुदायको सुख, शान्ति र समृद्धिमा हातेमालो गर्दै गाउँलाई एक आकर्षक पर्यटकीय गन्तव्यको रुपमा विकास गर्ने उद्देश्यका साथ क्याम्पसले मितेरी गाउँको अवधारणा ल्याएको क्याम्पस प्रमुख महाप्रसाद हड्खलेले बताए ।
गाउँको वर्तमान सामाजिक विकासका पूर्वाधारहरु, स्थानीय निकायको संलग्नता, पर्यटन विकास सम्वन्धी संस्थागत विकास, संस्कृति संरक्षण एवं विकास, वातावरणीय सचेतना, स्थानीय उत्पादन, स्थानीयवासीको माग र दिगोपनाको आधारमा जिल्लाको कुनै एक गाउँ छनोट गरिने उनले बताए ।
मुलुकको पर्यटन क्षेत्रमा काम गरिरहेका थुप्रै मानिसहरू प्रत्यक्ष वा परोक्ष जस्तोसुकै रोजगारमा भएपनि उनीहरु मध्ये अधिकांश दीगो पर्यटन विकास तथा संस्कृति संरक्षण सम्वन्धी कम सचेत छन् । तसर्थ, हाम्रा जीवन्त पुख्र्यौली पेशा र सीपका साथसाथै अतिथि सत्कार तथा खाना बनाउने, पर्यटन व्यवसाय सञ्चालन, उद्धार तथा पथ-प्रदर्शनका सीप, जलविहार गाइड, फोहोर व्यवस्थापन, स्वास्थ्य, खानेपानी तथा सरसफाइ, लैंगिक सचेतना, एचआईभी एड्स, गोबरग्याँस तथा सौर्य ऊर्जाजस्ता वैकल्पिक ऊर्जा, महिलाहरूका आधारभूत स्वास्थ्य समस्या लगायतका क्षेत्रमा समन्वय र सहकार्य गर्ने योजना यो कार्यक्रमको रहेको छ ।
यस्तै, यस कार्यक्रम अन्तर्गत पदयात्रा र पर्या-पर्यटन, होमस्टे तथा साधारण लज व्यवस्थापन, स्थानीय परिकारहरूको उपयोग तथा प्रवर्द्धन, वातावरणीय सचेतना, साधारण अंग्रेजी बोलचाल, नेतृत्व विकास, मातृ भाषा र प्राथमिक उपचार, सूचना तथा सञ्चार आदि सम्वन्धी अन्तरक्रिया, तालिम, गोष्ठी, शिविर तथा प्रदर्शनीका लागि क्याम्पसले स्थानीय सरकार, राष्ट्रिय एवं अन्तर्राष्ट्रिय सरकारी तथा गैरसरकारी संघसंस्थाहरुसंग समन्वय र सहकार्य गरिने कार्यक्रम रहेको सम्पदा नेपालका अध्यक्ष एवं पर्यटन विज्ञ हरिसिं गुरुङले बताए ।
अध्यक्ष गुरुङका अनुसार मितेरी गाउँ कार्यक्रम अन्तर्गत गाउँको विषयगत प्रोफाईल निर्माण, पर्यटन सेवाहरुको विविधीकरण, सम्पदाहरुको संरक्षण, पर्यटकीय पूर्वाधारहरुको विकास र सौन्दर्यीकरण, सुरक्षा प्रबन्ध र कुनै पनि ठाउँमा स्वतन्त्रतापूर्वक निर्धक्क घुमफिर गर्न पाउने वातावरणको प्रत्याभूति, बाह्रै महिना गन्तव्यसम्म पुग्ने सहज व्यवस्था, व्यवस्थित पदमार्गहरु, आफूले छनोट गरेको र तिरेको रकमअनुसारको आवास तथा यातायातको गुणस्तर, आतिथ्यता र सेवाको स्तर, पर्यटकसँग हुने कुराकानीका साथै पर्यटन व्यवसाय खोल्न र सञ्चालन गर्नका लागि सहज प्रक्रिया र आवश्यक सहयोग प्रदान गर्ने उपयुक्त संयन्त्र एवं पद्धतिको विकास गर्नका लागि सम्वन्धित पक्ष समक्ष पैरवीका साथै आवश्यकीय प्राविधिक सहयोग गरिने छ ।
