ऋषिङ अध्यक्ष कप खुल्ला भलिबल प्रतियोगिताको उपाधी बागलुङको गलकोटले जित्यो
भञ्ज्याङन्यूज
चौथो ऋषिङ अध्यक्ष कप, २०८० अन्तरपालिका खुल्ला भलिबल प्रतियोगिताको उपाधी बागलुङको गलकोट नगरपालिकाले जितेको छ । तनहुँको ऋषिङ गाउँपालिकाद्वारा आयोजित अन्तर पालिका खुल्ला भलिबल प्रतियोगिताको बुधबार ऋषिङ-४ थप्रेकमा भएको फाइनल खेलमा शुक्लागण्डकी नगरपालिकालाई हराउँदै गलकोटले उपाधी जितेको हो ।
खेलमा शुक्लागण्डकीलाई ३/१ को सेटले पराजित गर्दै गलकोटले उपाधि जित्न सफल भएको छ । विजेता बनेसँगै गलकोट नगरपालिकाले एक लाख ८७ हजार रुपैयाँ नगद, ट्रफी, मेडल र प्रमाणपत्र प्राप्त गरेको छ भने उपविजेता बनेको शुक्लागण्डकी नगरपालिकाले एक लाख २० हजार रुपैयाँ नगद, ट्रफी, मेडल र प्रमाणपत्र प्राप्त गरेको छ ।
प्रतियोगितामा नवलपुरको बौदीकाली गाउँपालिका तृतीय भएको छ भने भिमाद नगरपालिकाले सान्त्वना स्थान हासिल गरेको छ। तेस्रो र सान्त्वना हुने पालिकालाई क्रमशः ५४ हजार र १३ हजार ५ सय रुपैयाँ नगदका साथमा ट्रफी, मेडल र प्रमाणपत्र प्राप्त प्रदान गरिएको छ ।
११ टिमको सहभागिता रहेको प्रतियोगिताको समापन कार्यक्रममा व्यास नगरपालिका नगर प्रमुख वैकुण्ठ न्यौपाने, ऋषिङका अध्यक्ष राजेन्द्र कृष्ण श्रेष्ठ, जिल्ला समन्वय समितिका सदस्य निल बहादुर थापा, ऋषिङ-२ का वडा अध्यक्ष एवं खेलकुद समिति संयोजक दल बहादुर थापा लगायतले विजेताहरुलाई पुरस्कार प्रदान गर्दै शुभकामना व्यक्त गरेका थिए ।
