नवौं आदर्श कपको उपाधि थर्पुले जित्यो

तनहुँको म्याग्दे गाउँपालिकाको मनहरीमा आयोजित नवौं आदर्श तथा चौथो तारा स्मृति कपको उपाधि थर्पु युवा क्लब (ए)ले जितेको छ । शनिबार भएको फाइनल खेलमा दोभान युवा क्लबलाई पराजित गर्दै आदर्श कपको उपाधि थर्पुले चुमेको हो ।

खेलको एक मिनेटमै गोल गरी अग्रता लिएको थर्पु युवा क्लबलाई दोभानले दोस्रो हाफको १३ मिनेटमा गोल गरेर खेललाई बराबरमा ल्याएको थियो। निर्धारित समयमा दुवै टिमबाट एक/एक गोल भएपछि खेल ट्राइबेकरमा धकेलिएको थियो । ट्राइबेकरबाट थर्पु ३-२ को अन्तरले विजयी भएको हो ।

विजयसँगै थर्पु युवा क्लबले नगद एक लाख एक रुपैयाँ, मेडल र ट्रफी जितेको छ भने उपविजेता दोभानले नगद ५० हजार एक रुपैयाँ, मेडल र ट्रफीमा चित्त बुझाएको छ । यस्तै, शनिबारै भएको सेमिफाइनल खेलमा इगल एफसीलाई २-१ ले पराजित गर्दै थर्पु युवा क्लब (ए) फाइनलमा प्रवेश गरेको थियो ।

त्यस्तै थर्पु युवा क्लब (बि) लाई ५-० ले पराजित गर्दै दोभान युवा क्लवले फाइनलको यात्रा तय गरेको थियो । प्रतियोगितामा ३२ टोलीको सहभागिता रहेको आयोजक क्लबका अध्यक्ष गौरवराज रानाले जानकारी दिए ।

यस्तै, प्रतियोगिताका विजेतालाई पुरस्कृत गर्दै नेपाली कांग्रेसका नेता डा. रामशरण महतले अनुशासनको पाठ खेलबाट सिक्नुपर्ने बताएका छन् । चौथो तारा स्मृति कप फुटबल प्रतियोगिताको समापन गर्दै पूर्वमन्त्रीसमेत रहेका डा महतले खेलले मानिसलाई अनुशासित बनाउने चर्चा गरे ।

खेलले अनुशासनका साथै खेलाडीको शारीरिक तथा मानसिक विकास गर्ने उनको भनाई थियो । खेल क्षेत्रको विकासका लागि सरकारले प्राथमिकता दिनुपर्ने बताउँदै उनले स्थानीयस्तरबाट दक्ष खेलाडी उत्पादनका लागि खेलकूदका गतिविधि सञ्चालन भइरहनुपर्नेमा जोड दिए । गाउँपालिकाका अध्यक्ष मायादेवी रानाले खेलकूदको विकासका लागि गाउँपालिका प्रतिबद्ध रहेको बताइन् ।

सेयर गर्नुहोस्

प्रतिक्रिया दिनुहोस्

सम्बन्धित खवर