फुटसल प्रतियोगिताको उपाधी व्यासको बाराही माविलाई

तनहुँको शुक्लागण्डकीमा आयोजना गरिएको ज्ञान बगैचा फुटसल प्रतियोगिताको उपाधी व्यासको बाराही माध्यमिक विद्यालयले जितेको छ । शनिवार भएको फाइनलमा बाराहीले पोखराको सिद्धीविनायक माविलाई टाइब्रेकरमा ३-२ ले पराजित गरेको हो । निर्धारित समयमा २-२ गोल भएपछि खेल ट्राइबेकरमा पुगेको हो ।
उपाधीसँगै बाराही माविले नगद १५ हजार र द्धितीयमा चित्त बुझाएको सिद्धिविनायक माविले नगद १० हजार साथमा ट्रफि, मेडल र प्रमाणपत्र पाए । प्रतियोगितामा उत्कृष्ट गोलकिपर बाराहीका पुजन विक र उत्कृष्ट खेलाडी बाराहीकै चर्चित अधिकारी घोषित भएको विद्यालयका प्रिन्सीपल सुरेश पौडेलले जानकारी दिए । उनीहरुलाई विद्यालयका संस्थापक बाबुराम कार्की, सेराटोल विकास संस्थाका अध्यक्ष लाल बहादुर कार्की लगायतले पुरस्कार प्रदान गरेका थिए।
शुक्लागण्डकी-५ बेलचौतारामा रहेको ज्ञान बगैंचा इङ्लीस बोर्डिङ स्कुलको आयोजनामा एसइइ दिएर बसेका विद्यार्थीबीच एक आपसमा परिचय र सामिप्यताका लागि प्रतियोगिता गरिएको हो । एडिएसल फुटसल बेलचौतारामा भएको प्रतियोगितामा १६ विद्यालयको सहभागिता रहेको थियो । ज्ञान बगैचामा गएको वर्षदेखि कक्षा ११ र १२ को अध्यापन शुरु गरिएको छ ।