सम्पादकीय : बन्दीपुर भ्रमण वर्ष–२०२५
तनहुँको ऐतिहासिक र सांस्कृतिक धरोहर बोकेको नगर बन्दीपुरमा सन् २०२५ लाई “बन्दीपुर भ्रमण वर्ष”का रूपमा मनाउने तयारी गरिएको छ । यो कार्यक्रम बन्दीपुरको पर्यटन प्रवर्द्धनका लागि एउटा गतिलो माध्यम बन्ने देखिन्छ । बन्दीपुरको प्राकृतिक र सांस्कृतिक सम्पदाहरूलाई प्रवर्द्धन गर्नु मात्र नभई यस क्षेत्रको समग्र अर्थतन्त्रमा योगदान पु¥याउन यो भ्रमण वर्ष कार्यक्रम उपलब्धी मुलक बन्न सक्दछ । पहाडकी रानीको उपनामले परिचित यो नगरीलाई विश्वस्तरमा चिनाउने यस महत्वपूर्ण अवसरले पर्यटन क्षेत्रको नयाँ दिशा तय गर्ने अपेक्षासमेत गरिएको छ । बन्दीपुरको भ्रमण वर्ष २०२५ सुरु हुनु अघि नै यसको तयारी थालिएको छ । स्थानीय स्तरमा रोजगारका अवसर सिर्जना गर्दै पर्यटनलाई आर्थिक विकासको प्रमुख साधन बनाउनु यो कार्यक्रमको प्रमुख उद्देश्यका रुपमा अगाडि ल्याइएको छ । कार्यक्रममार्फत स्थानीय होमस्टे, होटल व्यवसायी र अन्य पर्यटनसँग सम्बन्धित क्षेत्रका व्यवसायीहरूको सञ्जाललाई मजबुत बनाउन, साथै सांस्कृतिक र पर्यटकीय गतिविधिहरूको माध्यमबाट यस क्षेत्रको ब्राण्डिङलाई सशक्त बनाउन स्थानीयको ऐक्यवद्धा महत्वपूर्ण हुन्छ ।
बन्दीपुर भ्रमण वर्ष २०२५ को प्रमुख आकर्षण भनेको सांस्कृतिक कार्यक्रम, फूड फेस्टिवल, र साहसिक गतिविधिहरू रहेका छन् । स्थानीय उत्पादनहरूको बजारीकरण र सांस्कृतिक धरोहरहरूको संरक्षणका लागि कार्ययोजना तयार गरिएको छ । यस्तो व्यापक गतिविधिहरूले पर्यटकको बसाइलाई लम्ब्याउने र यहाँको पर्यटन पूर्वाधारलाई थप बलियो बनाउन मद्दत पुग्ने छ । नयाँ वर्षका अवसरमा आयोजना गरिने तीन दिनसम्मको कार्यक्रमले यहाँ आउने पर्यटकोलाई केवल प्राकृतिक दृश्यावलोकनको अवसर मात्र नभई बन्दीपुरको सांस्कृतिक विविधता र स्थानीय जीवनशैलीलाई पनि नजिकबाट निहाल्ने अवसर सृजना हुने छ । यस कार्यक्रमको सफलता स्थानीय बासिन्दा, गाउँपालिका, होटल व्यवसायी र पर्यटन उद्योगका विभिन्न सरोकारवालाहरूको सघन सहभागितामा निर्भर हुनेछ। बन्दीपुर भ्रमण वर्षको आयोजनामा सार्वजनिक र निजी क्षेत्रको सहकार्य एक महत्वपूर्ण पक्ष हुनेछ । कार्यक्रमको सञ्चालनमा ५० प्रतिशत खर्च स्थानीय पालिका र ५० प्रतिशत खर्च अन्य संघसंस्थाहरू र सरोकारवालाहरूले व्यहोर्ने नीतिले यस कार्यक्रममा सबै पक्षको समान सहभागितालाई दर्शाएको छ । यसले यथार्थमा स्थानीय समुदायको प्रत्यक्ष योगदान र जिम्मेवारीलाई पनि बल पु¥याउनेमा विश्वास लिन सकिन्छ ।
बन्दीपुर भ्रमण वर्षको एक महत्वपूर्ण अंश भनेको स्थानीय गाइडहरूको तालिम र पर्यटकीय पूर्वाधारको विकास हो । २२ जना गाइडलाई तयारी अवस्थामा राखिएको छ, जसले पर्यटकलाई न केवल शहरका प्रमुख गन्तव्यहरूको जानकारी दिनेछन्, बरु बन्दीपुरको संस्कृति, इतिहास र परम्पराका बारेमा विस्तृत जानकारी प्रदान गर्न महत्वपूर्ण भूमिका खेल्नेछन् । यसका साथै, सार्वजनिक बिदा र विशेष अवसरहरूमा पर्यटकोंको आगमनमा वृद्धि देखिने अपेक्षासमेत गरिएको छ। यद्यपि बन्दीपुरमा पर्यटकको आगमन उल्लेख्य रुपमा बढेको छ, बास बस्ने पर्यटकहरूको संख्या भने केही घटेको देखिएको छ । यस समस्या समाधानका लागि स्थानीय व्यवसायीहरूले पैकेज टुर र आकर्षक प्रस्तावहरूसँग पर्यटकलाई आकर्षित गर्ने प्रयास गर्नुपर्ने देखिन्छ । यस वर्षको भ्रमण वर्षले भने यो चुनौतीलाई अवसरमा बदल्न यहाँका बास बस्ने संरचनाहरूमा सुधार र नयाँ विकल्पहरू उपलब्ध गराउन सक्नुपर्दछ । ‘बन्दीपुर भ्रमण वर्ष–२०२५’ सँगै बन्दीपुरमा पर्यटकीय गतिविधिहरूको नयाँ युग सुरु हुने अपेक्षा गरिएको छ । यस वर्षको कार्यक्रमले केवल बन्दीपुरको पर्यटनलाई पुनः प्रज्वलित गर्ने मात्र होइन, यसले अन्य क्षेत्रीय गन्तव्यहरूलाई पनि सशक्त बनाउने अवसर दिनेछ । यदि सही रणनीति र योजनाका साथ कार्यक्रमको कार्यान्वयन गरियो भने, यसले स्थानीय जीवनस्तरमा सुधार ल्याउने, रोजगारीका अवसरहरू सिर्जना गर्ने र नेपालको पर्यटन क्षेत्रमा नयाँ परिभाषा थप्नेछ । अब समय आएको छ कि बन्दीपुरलाई एक वैश्विक पर्यटकीय गन्तव्यका रूपमा स्थापित गर्ने, यसको ऐतिहासिक र सांस्कृतिक महत्त्वलाई विश्वभर चिनाउने । बन्दीपुर भ्रमण वर्ष–२०२५ यसको शुरुवात मात्र भएकाले यस कार्यक्रमलाई सफल र उपलब्धी मुलक बनाउनका लागि सबै पक्षले आ–आफ्नो ठाउँबाट हातेमालो गरी अगाडि बढ्न खाँचो छ ।
