डुम्रे-बेसीसहर सडकखण्डमा मोटरसाइकल दुर्घटना, दुईजना घाइते
तनहुँको भानु नगरपालिका-२ पाउतुरे खोलाको पुल नजिक आज बिहान मोटरसाइकल दुर्घटना हुँदा दुई जना घाइते भएका छन्।
इलाका प्रहरी कार्यालय भानुका अनुसार बिहान करिब १२:०० बजे तुरतुरेतर्फबाट डुम्रे आउँदै गरेको लु ३८ प ४२८२ नम्बरको मोटरसाइकल अनियन्त्रित भई पुलको सिमेन्टको पर्खाल नाघेर करिब २० मिटर तल खस्दा दुर्घटना भएको हो।
दुर्घटनामा गोरखा पालुङटार नगरपालिका-४ बस्ने ५० वर्षीय अर्जुन बहादुर अछामी (चालक) र सल्यान दार्मा गाउँपालिका-६ बस्ने २६ वर्षीया प्रतिभा देवकोटा घाइते भएका छन्।
प्रहरीका अनुसार अछामीको बायाँ खुट्टा र बायाँ आँखामा चोट लागेको छ भने देवकोटाको बायाँ आँखा र दाहिने खुट्टामा चोट लागेको छ। दुवैको अवस्था मध्यम रहेको जनाइएको छ।
घाइतेहरूलाई प्रारम्भिक उपचारका लागि लक्ष्मी अस्पताल डुम्रे लगिएको र थप उपचारका लागि पोखरास्थित फेवासिटी अस्पताल रिफर गरिएको प्रहरीको भनाइ छ।
दुर्घटनामा परेको मोटरसाइकल प्रहरी चौकी भन्सारको नियन्त्रणमा राखिएको छ।
