दमौलीमा सुरक्षा व्यवस्था कडा बनाउँदै नेपाली सेना, साँझ ५ बजेबाट कर्फ्यु लाग्दै
दमौली : जेनजी पुस्ताको आन्दोलनका कारण सोमबार र मंगलबार अशान्त बनेको तनहुँको सदरमुकाम दमौली बुधबार भने शान्त रहेको छ ।
सुरक्षा व्यवस्थाको जिम्मा नेपाली सेनाले लिएपछि मंगलबार रातीदेखि नै सडकमा सेना परिचालन भएको थियो । सेना परिचालन भएपछि तनहुँको जनजीवन सामान्य बन्दै गएको छ ।
प्रदर्शनका क्रममा तनहुँको दमौलीमा रहेको अधिकांश सरकारी कार्यालयमा तोडफोड, आगजानी भएका छन् । प्रदर्शनकारीहरुले मंगलबार साँझ दमौली कारागारमा रहेका कैदीबन्दीहरुलाई समेत भगाएका छन् ।
यस्तै, नेपाली सेनाले सुरक्षा व्यवस्था आफ्नो नियन्त्रणमा लिएसंगै दमौलीका चोकचोकमा सेना र नेपाल प्रहरीले संयुक्त गस्ति तथा सर्वसाधारणहरुको चेकजाँच, सोधपुछ गरेको छ ।
नेपाली सेनाले तनहुँको सदरमुकाम दमौलीमा कर्फ्यु लगाइएको छ । नेपाली सेनाले कफ्र्युका लागि बजार क्षेत्रमा माइकिङ गरेको छ ।
कफ्र्युका समयमा सर्वसाधारणलाई घरबाहिर ननिस्किन आग्रह गरिएको छ । बुधबार साँझ ५ बजेदेखि भोली बिहान ६ बजेसम्म कर्फ्यु जारी रहने जनाइएको छ । दमौली बजारका सम्पूर्ण व्यपार व्यवसाय बन्द भएका छन् भने मानिसहरुको चहलपहल न्यून रहेको छ ।
