पृथ्वी राजमार्ग किनार क्षेत्रका ऐतिहासिक सम्पदाहरुको पुनःनिर्माण गरिँदै
तनहुँ : पृथ्वीराजमार्ग सडक विस्तारसँगै तनहुँ खण्डमा पर्ने राजमार्ग किनार क्षेत्रका ऐतिहासिक सम्पदाहरुको पुनःनिर्माण भइरहेको छ ।
सडक विस्तार सम्पन्न भएसँगै आयोजनाले अहिले सडक सीमाभित्र परेका ऐतिहासिक सम्पदा, मठमन्दिर र पाटीपौवाहरूको पुनःनिर्माण कार्यलाई तीव्रता दिइएको हो ।
पृथ्वीराजमार्गअन्तर्गत मुग्लिन–पोखरा सडक विस्तारको पूर्वीखण्ड (आँबुखैरेनी–जामुने) को सडक निर्माण कार्य सकिएसँगै सम्पदा निर्माणमा तीव्रता दिइएको पूर्वी खण्डका सूचना अधिकारी इञ्जिनियर विष्णुप्रसाद पाण्डेले जानकारी दिनुभयो ।
एसियाली विकास बैंक (एडिबी) को करिब रु छ अर्ब ३१ करोड लागतमा स्तरोन्नति भएको यस ४१ किलोमिटर सडकको निर्माण पूरा भइसकेको छ । उहाँले भन्नुभयो, “सडक विस्तारका क्रममा विस्थापित भएका धार्मिक तथा सांस्कृतिक संरचनाको मौलिकता जोगाउन आयोजनाले करिब रु दुई करोड विनियोजन गरेको थियो ।”
विनियोजित बजेटबाट अधिकांश मठमन्दिर र पाटीपौवाहरूको पुनःनिर्माण कार्य धमाधम भइरहेको छ उहाँले भन्नुभयो, “व्यास नगरपालिका–१२ घाँसीकुवामा रहेको ऐतिहासिक भानु–घाँसी पार्क र कुवाको पुनःनिर्माणका लागि विशेष तयारी भइरहेको छ ।”
भानु–घाँसी पार्क संरक्षण समितिले तयार पारेको रु तीन करोडको बृहत् गुरुयोजनाअनुसार पार्क निर्माणको प्रक्रियाअघि बढाइएको छ । नेपाली साहित्यका आदिकवि भानुभक्त आचार्य र घाँसीको ऐतिहासिक प्रसङ्ग जोडिएको यस स्थललाई पर्यटकीय र सांस्कृतिक गन्तव्यका रूपमा विकास गर्ने लक्ष्य राखिएको छ ।
सडक कालोपत्रे, लेन मार्किङ र अन्य प्राविधिक काम सकिएसँगै अब सडक किनारका संरचना र सांस्कृतिक सम्पदालाई व्यवस्थित बनाउने कार्य भइरहेको हो । आयोजनाले भौतिक विकाससँगै ऐतिहासिक सम्पदाको संरक्षणलाई स्थानीय समितिको सहकार्यमा निर्माण कार्य धमाधम भइरहेको छ । विसं २०७७ माघमा ठेक्का सम्झौता भएर सुरु भएको यो आयोजना नेपालको लाइफलाइन मानिने राजमार्गको नमुना विस्तारका रूपमा हेरिएको छ ।
