बन्दिपुरको बाख्रा पकेट क्षेत्रका कृषकलाई डालेघाँसको विरुवा वितरण
भञ्ज्याङ न्यूज
तनहुँको बन्दिपुर गाउँपालिका वडा नं. १ को बाख्रा पकेट क्षेत्रका कृषकहरुलाई निःशुल्क डालेघाँसको विरुवा वितरण गरिएको छ । प्रधानमन्त्री कृषि परियोजना अन्तर्गत बन्दिपुर-१ लाई बाख्रा पकेट विकास कार्यक्रमा छनोट गरेको छ ।
कृषि परियोजना अन्तर्गत १८० कृषकलाई १० हजार वटा किम्बु डाले घाँसको विरुवा वितरण गरिएको वडाअध्यक्ष भानुभक्त पोख्रेलले बताए । उन्नत जातको बोयर बाख्रा र स्थानीय जातको बाख्राको स्रोत केन्द्रको रुपमा गाउँपालिकाले वडा नं. १ लाई विकास गर्न लागेको छ ।
किसानको आर्थिक आयआर्जनसंग जोडिएको र बाख्रा अनुसन्धान केन्द्र पनि वडा नं. १ मै भएका कारण बाख्राको पकेट क्षेत्र बनाउन राम्रो सम्भावना भएकाले प्रधानमन्त्री कृषि परियोजना कार्यक्रम अन्तर्गत १५ लाख रुपैयाँको बजेटमा आयोजना सञ्चालन गरिएका वडाध्यक्ष पोख्रेलले जानकारी गराए ।
कार्यक्रम अन्तर्गत बाख्राको खोर सुधारका लागि ४५ जना किसानलाई अनुदान दिइएको छ । यस अगाडि पनि यहाँका कृषकलाई बडर र खनायो घाँसका करिब १ हजार वटा विरुवा वितरण गरिएको थियो ।
वडाले ५० प्रतिशत अनुदानमा कृषकहरुलाई बोयर जातको बोका वितरण गर्ने तयारी गरेको छ । परियोजना कार्यक्रम अन्तर्गत किसानहरुलाई उत्पादन मुखि, व्यावसायिक बनाउने लक्ष्यका साथ काम अघि बढेको गाउँपालिकाका पशु शाखा प्रमुख मधुबिलास न्यौपानेले बताए ।
