सूर्य नेपालद्वारा जिपीलाई शववाहन हस्तान्तरण

तनहुँको शुक्लागण्डकी-७ शेराटारमा रहेको बहुराष्ट्रिय कम्पनी सुर्य नेपाल प्रालिले जिपी कोइराला राष्ट्रिय श्वास प्रश्वास उपचार केन्द्रलाई शव वहान उपलब्ध गराएको छ । जिल्लामा शव वाहन नहुँदा शव व्यवस्थापनमा समास्या हुँदै जिल्लावासीले ठूलो रकम खर्च गरी व्यवस्थापन गर्नुपर्ने अवस्था थियो ।

कम्पनीले सामाजिक उत्तरदायित्व अन्तर्गत जिल्लाका दश वटै स्थानीय तहले प्रयोग गर्ने गरी शव वाहन उपलब्ध गराएको कम्पनीका कर्मचारी अञ्जान दुवाडीले जानकारी दिए । सोमवार एक कार्यक्रमका बीच जिल्ला कोभिड व्यवस्थापन केन्द्र तनहुँका संयोजक एवं प्रमुख जिल्ला अधिकारी सागर आचार्यलाई कारखाना व्यवस्थापक बाबुराम कार्कीले शव वाहनको चाबी हस्तान्तरण गरेका थिए । लगत्तै अस्पतालका बोर्ड सदस्य समेत रहेका प्रजिअे आचार्यले अस्पतालका बोर्ड सदस्य शेषमणि आचार्य र निमित्त कार्यकारी निर्देशक डा. रामकुमार श्रेष्ठलाई चाबी हस्तान्तरण गरेका थिए ।

सो अवसरमा बोल्दै प्रमुख जिल्ला अधिकारी आचार्यले जिल्लामै शव वाहन नहुँदा कोभिड-१९ संक्रमणबाट मृत्यु भएकाहरुको शव व्यवस्थापनमा समस्या भएपछि सुर्य नेपालसँग सहयोग माग गरिए अनुसार अहिले शववाहन उपलब्ध भएको बताए । उनले सहयोगका लागि कम्पनी व्यवस्थापन पक्षलाई धन्यवाद दिए ।

त्यस्तै, अस्पतालका बोर्ड सदस्य आचार्यले सबैको साथ र सहयोगले जिपीको स्तरोन्नति भइरहेको उल्लेख गर्दै अस्पतालको थप विकासमा सबैको साथ सहयोग आवश्यक रहेको बताए । सूर्य नेपालले यस क्षेत्रमा आफ्नो सामाजिक उत्तरदायित्व अन्तर्गतका विभिन्न सामाजिक कार्यहरु गर्दै आइरहेको कारखाना व्यवस्थापक कार्कीले बताए । सूर्य नेपालले यसै बर्ष तनहुँ स्थित स्थानीय निकायको कोभिड-१९ प्रकोप व्यवस्थापन कोषमा रु ५० लाख सहयोग गरेको थियो भने गतवर्ष पनि शुक्लागण्डकी नगरपालिका तनहुँको कोभिड-१९ प्रकोप व्यवस्थापन कोषमा रु. दश लाख तथा सात वटै प्रदेशमा रु. एक/एक करोड प्रदान गरेको थियो ।

कम्पनिले गत आबमा म्याग्दे गाउँपालिका र शुक्लागण्डकी नगरपालिकालाई १/१ थान एम्बुलेन्स प्रदान गरेको थियो । त्यस्तै कोभिड-१९ को रोकथाम तथा उपचारको लागि यस क्षेत्रका बिभिन्न अस्पतालहरु तथा स्थानियबासीहरुलाई विभिन्न स्वास्थ्य सामाग्रीहरु वितरण गरी कोभिड-१९ को महामारी बिरुद्ध लड्न सहयोग गर्दै आएको जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर