वृद्ध भत्ता कटाएर गाईलाई डोण निर्माण
भञ्ज्याङ समाचारदाता/दुलेगौंडा
शुक्लागण्डकी-९ घारीमा रहेको गौ संरक्षण केन्द्रमा निर्माण गरिएको १५ मिटर लामो डोण सञ्चालनमा ल्याइएको छ । अद्धैत संस्था शुक्लागण्डकीले गौ मातालाई दानापानी खान सहज हुने गरी ट्रष्टसहितको डोण निर्माण गरिएको हो । अद्धैत संस्थामा आवद्ध वृद्धवृद्धाहरुले ज्येष्ठ नागरिक भत्ता कटाएर डोण निर्माणमा सहयोग गरेको अध्यक्ष भीष्मराज पौडेलले जानकारी दिए । नवनिर्मित डोणको अद्धैत संस्था गण्डकीका प्रमुख धनप्रसाद गुरुङले शुभारम्भ गरेका थिए । उनले उमेर बढ्दै र शरीर कमजोर हुँदै गएपनि इच्छाशक्ति र एकता हुने हो भने जुनसुकै काम गर्न सकिन्छ भन्ने उदाहरण अद्धैत संस्था शुक्लागण्डकीले दिएको बताए ।
निर्माण समितिका अध्यक्ष भिष्मराज पौडेलको अध्यक्षतामा भएको कार्यक्रममा वडाध्यक्ष लोकनारायण श्रेष्ठ, बेगबहादुर खड्का, केशव सापकोटा लगायतले बोलेका थिए । हिन्दु धर्मप्रति आस्थावान् ज्येष्ठ नागरिकहरुले गौँ संरक्षण केन्द्र भनिए पनि गाई संरक्षणको नाममा तारजाली लगाएर थुन्ने काम मात्र भएको गुनासो गरे । नगरपालिकाले बर्षेनी बजेट विनियोजन गरेपनि प्रभावकारी काम हुन नसकेको उनीहरुको गुनासो थियो ।
उक्त ट्रष्टसहितको डोण ४ लाख ५३ हजार ३८९ रुपैयाँको लागतमा निर्माण गरिएको कोषाध्यक्ष सुवेदार डिलबहादुर श्रेष्ठले जानकारी दिए। उनका अनुसार डोण बनाउन ५७ हजार ५९५, ढलान निर्माणमा ४९ हजार ९२०, छाना छाउन २ लाख ९४ हजार ८७४ र पराल खरिदमा ५१ हजार रुपैयाँ खर्च भएको बताइएको छ ।