निजामती कर्मचारी संगठन तनहुँको अधिवेशन स्थगित
भञ्ज्याङ न्यूज
नेपाल निजामती कर्मचारी संगठन तनहुँको शनिबार हुने अधिवेशन स्थगित भएको छ । कोभिड-१९ को तेस्रो लहरको जोखिम बढेपछि संगठनको अधिवेशन स्थगित गरिएको बताइएको छ ।
नेपाल सरकार तथा स्थानीय प्रशासन समेतले स्वास्थ्य मापदण्डलाई ध्यानमा राखी २५ जना भन्दा कम संख्यामा उपस्थिति भई सभा सम्मेलन गर्न निर्देशन जारी गरेको र कर्मचारी पनि संक्रमित भई कार्यालयको सेवा प्रवाहमा समस्या देखिएकाले प्रस्तावित मितिमा अधिवेशन सम्पन्न गर्न नसकिएको संगठनका अध्यक्ष रुद्र ठकुरीले जानकारी दिए।
अध्यक्ष ठकुरीले विहीबार एक विज्ञप्ति जारी गर्दै स्वास्थ्य र सुरक्षाको मापदण्डलाई कडाइका साथ पालना गरी उच्च मनोवलका साथ सेवा प्रवाह गर्न कर्मचारीहरुलाई आग्रह गरेका छन् । उनले महामारी कम हुँदै गएपछि अर्को मितिमा अधिवेशन गरिने जनाएका छन् ।
