छ दिनसम्म दमौली बजारमा दैनिक सात घण्टा विद्युत अवरुद्ध हुने
दमौली । तनहुँको सदरमुकाम दमौली बजारमा मंगलबारदेखि छ दिनसम्म दैनिक सात घण्टा विद्युत अवरुद्ध हुने भएको छ ।
मुग्लिन पोखरा सडक विस्तार अन्तर्गत दमौली बजार क्षेत्रको सडक किनारमा नयाँ लाइन विस्तार गरी पुरानो संरचना हटाउने कार्य गरिने भएकाले मंगलबारदेखि ३० गतेसम्म बिहान १० बजेदेखि साँझ ५ बजेसम्म विद्युत अवरुद्ध गरिने भएको हो ।
सडक विस्तारका क्रममा पोल गाड्ने काम भइरहेको र उक्त पोलमा नयाँ लाइन विस्तार गर्न व्यास नगरपालिकाको वडा नं. १, २, ३, ४ र ५ को केही भागमा आवश्यकता अनुसार विद्युत अवरुद्ध हुने नेपाल विद्युत प्राधिकरण तनहुँ वितरण केन्द्रका प्रमुख विजय रेग्मीले बताए ।
दमौली फिडरबाट विद्युत आपूर्ति हुने यी ठाउँहरुमा आवश्यकता अनुसार विद्युत अवरुद्ध गरेर काम सुरु गर्न लागिएको उनले बताए । उनका अनुसार समयमै कार्य सम्पन्न भएमा वा मौसममा प्रतिकूलता भएमा, बन्द गर्ननपर्ने अवस्थामा सो अवधिमा विद्युत सेवा सञ्चालन हुने छ ।
