घिरिङको घ्यान्छाप–पुटार सडकको दोस्रो खण्डमा कालोपत्र
घिरिङ : तनहुँको घिरिङ गाउँपालिका–१ घ्यान्छाप–पुटार मोटरमार्ग अन्तर्गत घ्यान्छापदेखि बोहोछापसम्मको करिब सात सय मिटर सडक खण्डमा कालोपत्र गरिएको छ । गण्डकी प्रदेश सरकार र घिरिङ गाउँपालिकाको समपुरक बजेट १ करोड १७ लाख रुपैयाँको लागतमा डिबिएसटी प्रविधि मार्फत कालोपत्र गरिएको हो ।
हालसम्म उक्त खण्डको करिब ८२ प्रतिशत काम सम्पन्न भइसकेको छ भने बाँकी काम अन्तिम चरणमा पुगेको घिरिङ गाउँपालिकाका प्राविधिक अमृत कुमार श्रेष्ठले जानकारी दिए। सडक निर्माणका लागि लिस्सम निर्माण सेवा कम्पनीसँग २०८१ मंसिर २४ गते सम्झौता भएको गरिएको थियो ।
यस्तै, घ्यान्छाप–पुटार सडकको पहिलो खण्ड, अर्थात् स्वामिभञ्ज्याङ देखि घ्यान्छाप सम्मको भाग ७ सय मिटर सडक खण्ड कालोपत्र गर्ने कार्य अगाडि बढाइएको छ । गाउँपालिकाले सो कार्यका लागि २ करोड रुपैयाँ बजेट विनियोजन गरिसकेको छ ।
आर्थिक वर्ष २०८२÷८३ मा थप ९१ लाख रुपैयाँ समपुरक संघीय बजेट पनि व्यवस्था गरिएको गाउँपालिका अध्यक्ष होम बहादुर थापाले जनाए । गाउँपालिका अध्यक्ष थापाले गाउँपालिकाको मुख्य सडक मुद्धाको कारण काम गर्न नसकेकोले शाखा बाटोका योजनालाई प्राथमिकतामा राख्दै आएको बताए ।
सडक निर्माणपछि यस क्षेत्रका बासिन्दाले सहज र सुरक्षित यातायात सेवा पाउने विश्वास गर्दै बर्खामा हिलो र हिउँदमा धूलोका कारण यातायातमा हुने समस्याको अन्त्य हुने अध्यक्ष थापाले बताए ।
यस्तै, मानपुर–डेढगाउँ सडक खण्डको काम सम्पन्न पछि स्थानीयलाई यातायात सेवा सहज बनेको छ । मदन मोटर मार्ग र पशुपति मोटरमार्ग जस्ता शाखा बाटोहरूको निर्माणका लागि बजेट विनियोजन गरिसकिएको तर ठेकेदारले काम गर्न ढिलाई गरेको कारण केही समस्याहरू आएको अध्यक्ष थापाले बताए ।
