दमौलीमा रोटर्याक्टको दौड प्रतियोगिता हुने
रोटर्याक्ट क्लब अफ दमौलीले स्व.सचिन कुमार श्रेष्ठको स्मृतिमा खुल्ला दौड प्रतियोगिता गर्ने भएको छ । क्लबले फागुन १५ गते शनिबार १८औं स्व. रो.सचिन स्मृति खुल्ला दौड प्रतियोगिता आयोजना गर्न लागेको हो । क्लबले बुधबार पत्रकार सम्मेलनको आयोजना गरी प्रतियोगिताबारे जानकारी गराएको छ । क्लबका अध्यक्ष राजकुमार श्रेष्ठले प्रतियोगिताको तयारी तीव्र पारिएको जानकारी दिए ।
दमौली प्रशासन -अनसन) चोकबाट शुरु हुने दौड गल्बुवेशी, जलदेवी टोल हुँदै छाब्दी बसपार्कमा पुगेर टुङ्गिनेछ । ९ किमि दूरीको दौड प्रतियोगिताका प्रथमलाइ रु १० हजार १०, द्वितीयलाई रु ८ हजार ८ र तृतीय हुनेलाई रु ६ हजार ६ पुरस्कार प्रदान गरिनेछ । प्रतियोगितामा ५० भन्दा बढीको सहभागिता रहने अपेक्षा गरिएको छ ।
विगतका वर्षहरुमा प्रशासनचोकबाट शुरु भइ घाँसीकुवा पुगेर पुनः प्रशासनचोकमा आएर दौड प्रतियोगिता सकिने गरेपनि यस पटक दौडको रुट परिवर्तन गरिएको अध्यक्ष श्रेष्ठले जानकारी दिए । छाब्दीबाराही मन्दिरको धार्मिक पर्यटन प्रवर्द्धनका लागि पनि दौडले सहयोग पुग्ने उनले विश्वास व्यक्त गरे ।
विगतका वर्षन्दा यस वर्षपुरस्कार राशि वृद्धि गरिएको रोटर्याक्ट क्लबका रोटर्याक्ट नेपाल जोन ३ का सचिव एवं कार्यक्रम संयोजक विशाल श्रेष्ठले जानकारी दिए । रोटर्याक्ट क्लब अफ दमौलीका संस्थापक सहसचिव सचिनकुमार श्रेष्ठको स्मृतिमा क्लबले विभिन्न कार्यक्रम गर्दै आएको छ ।
पत्रकार सम्मेलनमा रोटरी क्लवका अध्यक्ष दामोदर भण्डारी, नेपाल पत्रकार महासंघ तनहुँका अध्यक्ष ओमकार आचार्य, पूर्व अध्यक्ष प्रदीप काफ्ले लगायतले सामाजिक काममा क्लबको योगदान उल्लेख्नीय रहेको बताए ।
