अन्तरविद्यालय स्तरीय बास्केटबल प्रतियोगिता
तनहुँको दमौलीमा अन्तर विद्यालय स्तरीय बास्केटबल प्रतियोगिता सञ्चालन गरिएको छ । हैरान्स क्लव दमौलीले विहीबारदेखि व्यास नगरपालिका-३ मा दोस्रो अन्तर विद्यालय स्तरीय छात्रछात्रा बास्केटबल प्रतियोगिता सञ्चालन गरेको हो । बास्केटबल खेलमा युवायुवतीको आकर्षण बढाउने र दक्ष खेलाडी उत्पादन गर्ने उद्देश्यले क्लवले प्रतियोगिता आयोजना गरिएको क्लवका अध्यक्ष रविन पौडेलले बताए।
‘विसं २०७९ असोजमा नवौं राष्ट्रिय खेलकुद प्रतियोगिता अन्तर्गत तनहुँमा महिला बास्केटबल भएको थियो । सो पछि यहाँ बास्केटबल खेलमा आकर्षण बढेको छ’, उनले भने, ‘यो प्रतियोगिताले दक्ष बास्केटबल खेलाडी उत्पादन गर्न सहयोग पुग्ने हाम्रो विश्वास छ ।’
प्रतियोगितामा छात्रतर्फ सात र छात्रातर्फ तीन विद्यालयको सहभागिता रहेको छ । छात्रतर्फ सत्यवती मावि, माया एकेडेमी, निर्मल मावि, पराशर कलेज, बाराही आवासीय माध्यमिक विद्यालय, कन्काई ग्लोवल एकेडेमी र व्यास दिव्यज्योति बोर्डिङ स्कूलको सहभागिता रहेको छ । छात्रातर्फ सत्यवती मावि, पराशर कलेज र बाराही आवासीय माध्यमिक विद्यालयको सहभागिता रहेको क्लवका सचिव अशोक गिरीले जानकारी दिए।
प्रतियोगितामा छात्रतर्फ प्रथम हुनेलाई रु दश हजार र द्वितीय हुनेलाई नगद रु पाँच हजार प्रदान गरिनेछ भने छात्रातर्फ प्रथम हुनेलाई रु सात हजार र द्वितीय हुनेलाई रु चार हजार नगद पुरस्कार प्रदान गरिनेछ । गत वर्ष आयोजित प्रथम अन्तरविद्यालय स्तरीय बास्केटबलको उपाधि छात्रछात्रा दुवैतर्फ सत्यवती माविले जितेको थियो ।
उक्त प्रतियोगिताको उद्घाटन गर्दै व्यास नगरपालिकाका प्रमुख वैकुण्ठ न्यौपानेले सबै क्षेत्रको खेलको विकासका लागि नगरपालिका प्रतिबद्ध रहेको बताए।
जिल्ला खेलकुद विकास समितिका अध्यक्ष अनिल पाण्डे, व्यास नगरपालिका-३ का वडाध्यक्ष अनुप राना, कराँते महासंघ गण्डकी प्रदेश अध्यक्ष मनिराज थापा, बास्केटबल संघका अध्यक्ष भुवन गोशली लगायतले नवौं राष्ट्रिय खेलकुदको प्रभावका कारण जिल्लामा बास्केटबल खेलमा आकर्षण बढेको बताए ।
