भिमादको वडा नं. ९ मा विद्युतका काठे पोल विस्थापित गरिंदै
तनहुँको भिमाद नगरपालिका-९ मा विद्युतका काठे पोल विस्थापन गर्न शुरुआत गरिएको छ। काठे पोलले जोखिम बढाएपछि वडाका विभिन्न ठाउँमा काठे पोल विस्थापन गरी फलामे पोल राख्न शुरु गरिएको हो ।
उक्त वडाको पाथर्दी, जौपानी, सखेप, कटनछाप लगायत ठाउँमा काठे पोल हटाएर फलामको पोल राख्न शुरु गरिएको वडाध्यक्ष इमानबहादुर थापाले बताए ।
‘वडाभित्र करीब डेढ/दुइ सय काठको पोल बाँकी छन्, सबै विस्थापित गछौ’, थापाले भने, ‘त्यसका लागि स्थानीयवासीसँग सहकार्य गरेका छौँ ।’
यसका लागि स्थानीयवासीले ढुवानी र गाड्ने काममा श्रमदान गरेका छन् भने पोल नगरपालिकाले उपलब्ध गराएको छ । गण्डकी प्रदेश सरकारको काठे पोल विस्थापन कार्यक्रममार्फ नगरपालिकाका विभिन्न वडामा फलामको पोल उपलब्ध गराइएको छ ।
“काठे पोलले जोखिम बढाइरहेको थियो, हरियो रूख र बारीका कान्लाहरूमा लामो समयदेखि तारहरू असुरक्षित थियो, सबैलाई व्यवस्थापन गर्ने काम भइरहेको छ”, वडाध्यक्ष थापाले बताए । पाथर्दीका युवा शिवकुमार आलेले स्थानीयवासीले पोल ढुवानीका लागि श्रमदान गरिरहेको जानकारी दिए ।
