घिरिङमा घर भत्किएर विस्थापित परिवारलाई खाद्यान्न र लत्ताकपडा
घिरिङ : तनहुँको घिरिङ गाउँपालिका–३ ग्याझा कुवादीमा अविरल वर्षाका कारण घर भत्किएर विस्थापित भएका परिवारलाई तत्काल आवश्यक खाद्यान्न तथा लत्ताकपडा सहयोग गरिएको छ ।
असोज ८ गतेदेखि परेको लगातार वर्षाका कारण असोज १० गते राति स्थानीय मनबहादुर नेपाली र लालिमाया नेपाली बस्दै आएको घर भत्किएको थियो । घर पूर्ण रूपमा क्षति हुँदा घरभित्र रहेका अन्नपात, लत्ताकपडालगायत सामग्री पुरिएपछि नेपाली परिवार विस्थापित अवस्थामा रहेको थियो ।
विस्थापित परिवारको तत्कालीन आवश्यकता सम्बोधन गर्न आइतबार घिरिङ गाउँपालिकाको तर्फबाट खाद्यान्न तथा लत्ताकपडा उपलब्ध गराइएको हो । नेकपा एमाले घिरिङ गाउँ कमिटीको तर्फबाट पनि पीडित परिवारलाई आवश्यक खाद्यान्न तथा कपडा सहयोग गरिएको छ ।
घर नै भत्किएपछि दैनिक गुजारा तथा बसोबासमा समस्या झेलिरहेका परिवारलाई तत्काल राहतस्वरूप सहयोग गरिएको जनाइएको छ । वर्षाका कारण घर क्षति भएपछि परिवार सुरक्षित स्थानमा आश्रय लिएर बस्न बाध्य भएको थियो ।
पीडित परिवारको पुनःस्थापनाका लागि नयाँ घर निर्माण गर्ने प्रक्रिया अघि बढाउने प्रतिबद्धता पनि जनाइएको छ। सुरक्षा निकाय, सम्बन्धित वडा तथा गाउँपालिकाका जनप्रतिनिधिले क्षतिको अवस्था र आवश्यक प्रक्रियाबारे समन्वय गरी नयाँ घर निर्माणका लागि पहल गर्ने बताएका छन् ।
अविरल वर्षाका कारण ग्रामीण क्षेत्रमा घर, सडक तथा अन्य भौतिक संरचनामा क्षति पुगिरहेका बेला स्थानीय तह र विभिन्न संघसंस्थाबाट पीडित परिवारलाई तत्काल राहत उपलब्ध गराउने क्रमसमेत जारी रहेको छ ।
